Page:Machaut - Le Voir Dit, 1875.djvu/208

154

[vers 3663]

LE LIVRE

Et diſt : « Vous revenrés demain,
« Qu’au matinet me leveray
« Et à Dieu vous commanderay,
« Et non pas cy, devant la gent. »
Je reſpondi com ſon ſergent :
« Ma dame, à Dieu ! puis qu’il vous plait. »
Je m’en alay ſans autre plait,
Mais je fis ſon commandement ;
Car j’y vins ſi ſongneuſement
Que la belle encor ſe giſoit.
Et l’eſveillay, ce me diſoit,^[1]
À l’ouvrir d’une feneſtrelle
Qu’à feneſtre eſtoit delès elle.
Si tiray un po la courtine
De cendal, à couleur ſanguine.
Mais elle n’eſtoit pas ſeulette,
Qu’o li eſtoit la pucellette
Qui, el vergier vert & feuilli,
Les fleurs dou chapelet cueilli.
Moult coiettement la huchay,
Et petit de li m’approchay,
En ſa grant biauté regardant,
S’onneur & ſon eſtat gardant,
Qu’autrement faire ne l’oſoie,
Pour ſon courrous que je doubtoie.
Mais la belle ne dormoit mie,
Ainſois par ſa grant courtoiſie,
Par devers moy ſe retourna.
N’elle prins nul autre atour ha,^[2]

1. Je l’éveillai en ouvrant la fenêtre, comme elle me dit.
2. Et ne prit-elle aucun autre atour. Il n’y a pas ici d’obſcurité, ni ſurtout dans le vers ſuivant. Cependant la miniature les repréſente tous