Pour ma douce dame jolie.
Si que, ſans faire long detri,
Ceſte lettre-ci li eſcri
Moult humblement, en accuſant
Deſir, & en moi eſcuſant.
XXV. — Mon tres-dous cuer, ma chiere ſuer & ma tres-douce amour ; je vous mercye tant humblement comme je puis, & non mie tant comme je doy, de vos douces & gracieuſes eſcriptures qui m’ont tant conforté qu’il n’eſt triſieſce ne doleur qui me puiſt venir. Si feray ce que vous me commandés à mon pooir ; & ſe je vous ay un po rudettement eſcript, ce fait Deſir que j’ay plus creu que je ne déuſſe. Si, le me vueilliés pardonner. Des nouvelles de par de ça & vous plaiſt ſavoir, pluſeurs grans ſigneurs ſcevent les amours de vous & de mi, & ont envoié par devers moy un chapellain qui eſt moult mes amis, & m’ont mandé que par li je leur envoie de vos choſes & les reſponſes que je vous ay fait ; eſpecialement : Celle qui onques ne vous vit ; ſi ay obéy à leur commandement. Car je leur ay envoyé pluſeurs de vos choſes & des miennes, & ont volu ſavoir ſe il eſt verité que je aie voſtre ymage, & je l’ay monſtré à leur meſſage, bien & richement parée & miſe haut au chevés de mon lit ; ſi que chaſcuns ſe merveille que ce puet eſtre. Et ſachiez qu’il ſcevent comment vous m’avez reſuſcité, & rendu joie & ſanté ſans ce que vous m’éuſſiez onques véu. Si tiennent ſi grand bien de vous, de voſtre douceur & de voſtre humilité, comme de dame dont il oÿſſent onques parler. Si leur ay eſcript, à voſtre loenge, le bien & la douceur qui y eſt & ce qu’il m’en ſemble, mon dous cuer. Et puiſque il eſt ainſi que, ou royaume & en l’empire, nos amours ſont ſceues & revelées, & eſpeciauement des meilleurs, bien ſeroit ores de male heure nés cils qui fauſſeroit de nous .ii., car jamais n’aroit honneur. Et, par m’ame, ma tres-douce ſuer, j’ay ſi grant fiance en voſtre noble cuer & en voſtre
