tres-fine douceur, que je ſay certainement qu’il n’i porroit avoir que loyauté : ſi en ſuis tous ſeurs, & je m’en aten à vous de tous poins. Et, quant à moy, il ne me ſemble mie que nes la mort péuſt mon cuer oſter ne departir de vous. Si en devés bien eſtre en voſtre pais, : & certes, ma tres-douce ſuer, j’ay ſi grant joie & ſi grant plaiſance en voſtre bon renon & en voſtre loenge qui ainſi s’eſpant par tout & eſpandera, ſe Dieus me donne vie, qu’il n’eſt doleur ne triſteſce qui me peuſt venir. Et m’eſt avis que tout le bien & la joie que je voy que li autre ont, ſoit doleur & tribulation contre la joie & le bien que j’ay, & il y ha bien cauſe ; car ſe j’eſtoie li plus parfais en toute choſe qui onques fuſt, ſi truis-je en vous aſſez de biens & de douceurs. Et, mon dous cuer, quant au noble & au riche treſor dont j’ay la clef, par Dieu je l’iray deffermer le plus toſt que je porray, & ſeront au deffermer Foy & Loiauté, Droiture & Meſure. Et ſe Deſirs voloit faire le maiſtre on ne li ſoufferroit mie, puiſque vous & moy & Loiaulté & bonne Eſperance ſommes alliés contre li.[1] Et, par ma foi, il eſt à moitié deſconfis ; ne je ne priſe mais riens choſe qu’il me puiſt faire, pour les douces & amiables lettres que vous m’avez eſcriptes. J’ay fait un Rondel que je vous envoie, & arez le chant par le premier que j’envoieray vers vous : & y eſt voſtre nom, ainſi comme vous le verrez, par ceſte cedule encluſe en ces preſentes. Et, mon dous cuer, s’il vous ſouvient de moy, par Dieu vous n’eſtes pas deceue, car je laiſſe tout autre ſouvenir & toutes autres penſées pour vous : & de ce que vous dites que vous vous fiez tant en moy que je ne porroie faire choſe qui vous péuſt deſplaire, Dieus le vous
- ↑ Il faut admettre ici que la jeune fille lui avoit dit : « Je vous confie le ſecret & la propriété de mon honneur. Vous pouvez en diſpoſer à votre gré ; j’ai l’aſſurance que vous garderez bien notre ſecret & n’abuſerez pas des droits abſolus que je vous donne. » De là la proteſtation que fait l’heureux dépoſitaire de garder meſure & loiauté, juſqu’a retenir Deſir s’il vouloit trop faire le maître.
