mire, car par m’ame je m’en garderay bien, ſe Dieu plaiſt. Mon tres-dous cuer, par m’ame, onques je n’oy dire de vous que bien & loyaulté & honneur. Si ay toute doubte, toute ſouſpeçon bouté hors de mon cuer, & tien que voſtre belle & douce bouche ne daigneroit mentir. Si tenés fermement que je vif en joie & en revel plus que amans qui ſoit en pays où je demeure ; & me ſuis remis à faire voſtre livre, enquel vous ſerés loée & honnourée de mon petit pooir, & toutes autres dames pour l’amour de vous. Et, ma tres-douce amour, les oreilles vous deveroient bien fort & ſouvent mengier ;[1] car je ne ſuis en compagnie que on ne parole tousjours de vous, & en tel bien que tous cils qui vous ont véu vous comperent à l’eſcharboucle, qui eſclairciſt les oscures nuis, au ſaphir qui garit de tous maus, & à l’eſmeraude qui fait tous cuers resjoir : &, brief, chaſcuns vous tient comme la fleur des dames. Et, par icellui qui me fiſt, j’en ay tele joie que je ne le vous porroie dire n’eſcrire, & tout ce ſaurés-vous bien par autre que par moy. Si ne donroie mie mes ſouhais, mes ſouvenirs & mes douces penſées pour l’avoir d’un tres-bien riche roiaume. Car quant je penſe bien à voſtre pure, fine & eſmerée douceur qui eſt dedens mon cuer enfermée comme treſor en coffre, & enclavée comme pierre en or, il m’eſt ſouvent advis que je ſoie avec vous auſſi doucement que je fui onques. Et, mon dous cuer, ſe je ne vous envoie de mes choſes ſi ſouvent comme je ſoloie, je vous ſuppli humblement qu’il ne vous deſplaiſe mie. Car ſe je avoie la teſte de fer & le cuer d’acier & le corps d’aymant, ne porroie-je mie bien faire voſtre livre & penſer à faire autres choſes, qu’il ne convint laiſſier l’un pour l’autre. Je vous ſuppli tant humblement comme je puis & de tout mon cuer que vous me vueilliez envoier l’une des choſes que vous mettés plus près de voſtre cuer, par quoy je la puiſſe mettre ſi près du mien comme je porray. Et certes ſe vous la
- ↑ Mengier, pour démanger. Nous diſons aujourd’hui tinter.
