La roÿne, qui s’atournoit :
Et li més celle part tournoit,
Et fiſt tant qu’il vint devant elle,
Et puis li conta la nouvelle ;
Et il jura, par ſaint Antoine,[1]
Que la cité de Babiloine
Eſtoit contre li revelée.
La dame eſtoit eſchevelée,
Fors tant qu’une treſſe treſſie
Avoit, & l’autre deſtreſſie.
Mais en ce point où elle eſtoit,
La dame tantoſt ſe veſtoit,
Et s’en ala à grans eſlais
À ſa gent, dedens ſon palais ;
Et leur dit, com vaillant & ſage,
Sa deſconvenue & l’outrage
Que cils li avoit recité
De Babiloine la cité ;
Et que jamais n’aroit bon jour,
N’en ville ne feroit ſejour,
N’a ſon cuer n’aroit grant léeſce,
Ne treſſeroit ſon autre treſce,
Tant que li ſeroit amendé.
Et lors à ſes grans os mandé,
Et ſi bien les ſot pourvéoir
Que la ville vint aſſéoir ;
Et là fiſt tant qu’en ſa preſence
Vinrent tuit à obéiſſence.
Ne fu ce fait tres-honnourable ?
S’Hector, le puiſſant combatable,
L’éuſt fait, ne fut-ce grant choſe ?
- ↑ Forme de ſerment pour le moins douteuſe.
