Dont il avint, à la parcloſe,
Que ceuls du paÿs, pour celle ouevre,
Firent une ymage de cuevre
Qui d’une part eſtoit treſſie,
Et de l’autre part deſtreſſie
À ſa ſamblance, de tel taille
Comme elle eſtoit à la bataille,
En ligne de ceſte victoire ;
Par quoy il en fuſt grant mémoire.
Or vueil ma dame comparer
À Semiramis qui parer
Ne volt ſon chief ne ſa figure,
Fors que des euvres de nature,
Juſqu’atant que la villenie
Qu’on li avoit fait fuſt vengie.
Je ſuis la cité proprement,[1]
Que ſiene fuis entièrement,
De ſon droit & de ſon demainne ;
Et elle eſt de moy ſouveraine.
Mais Deſirs & Merencolie,
Doubtance de perdre ma mie,
Longue demeure, Longue attente
Du véoir, Penſée dolente,
Et ce que je n’ay congnoiſſance
Où elle maint ne acointance,
N’en ce monde n’a créature
Qui li die ce que j’endure,
Font ſouvent murmuration
En mon cuer, & rebellion :
Et ſi eſtaingnent la lanterne
- ↑ Je ſuis à l’égard de ma dame ce que Babylone étoit à Sémiramis.
