rence entre les biens de vous & de moy, que le bien de l’un ne ſoit le bien de l’autre, par ma foi, vous avés droit ; car auſſi n’i en mes-je point ; & je tien certainement que tout le bien de vous eſt le mien, & le mien ſi eſt le voſtre : ne je ne porroie eſtre mieus à mon gré. Et je vous jur, par ma foy, que l’amour que j’ay à vous eſt ſi grans que nul puet plus eſtre. Et ſi, m’eſt avis que elle croiſt encore tous les jours & s’i renvie le bien amer.[1] Et je ſuis certaine que ſi faites vous à voſtre tour ; ſi, ne ſera pas legere choſe à faire faillir le jeu qui ſouvent eſt renviez. J’ay eu les .iiii. balades que vous m’avés envoies, & en ay aprinſe l’une, ainſi comme celle qui ſe fait fort de vous. Mais il me fait grant mal de voſtre peine. Si vous pri, mon tres-dous cuer, que vous ne prengniés pas tant de peine que voſtre corps en vaille pis ; car, par Dieu, il m’en ſeroit trop mal. Et il me ſouffiroit bien toutesfois que vous m’eſcriſîés, ſe vous m’envoiés une petite chanſon ou aucun rondel ; mais qu’il fuſt notés : car je n’en vueil nuls chanter que des voſtres ; & ſi, m’en aporte-l’en bien ſouvent ; mais je ne vueil mettre paine à les apenre, car il m’eſt avis que tout ce que les autres font ne vault rien à regarder ce qui vient de vous. Si vous pri, mon tres-dous cuer, que vous m’en envoiez mains, ſi les m’envoiez notées : &, s’il vous plaiſt, que vous m’envoiez le virelai que vous féyſtes avant que vous n’éuſſies veue, qui s’appelle L’ueil qui eſt le droit archer ou Plus belle que le biau jour, car il me ſemblent tres-bons. Et, mon dous cuer, vous m’avez eſcript que je vous faiz veiller grant partie des nuis & eſcrire grant partie des jours ; &, par ma foy, auſſi le me faictes vous, excepté ce que je n’eſcris mie tant que vous faictes. Maiz je penſe tant à l’amour qui eſt entre vous & moy, que par le Dieu en qui je croy, je y penſe plus que en nulle autre choſe. Et avient ſouvent que ſuis l’eſpace d’un grant jour en ma chambre ou en aucun
- ↑ S’i renvie, s’y renchérit, s’y accroît.
