Chevauchay par mons & par plaines,
Pour viſeter un mien ſigneur,
Mille fois de l’autre gringneur.[1]
Quant il me vit, il priſt à rire ;
Et puis me commança à dire :
« Amis, vous batez les buiſſons
« Dont autres ont les oiſillons. »
Mais il le diſt en audience,
Devant tous, & en ma preſence.
Quant ainſi me vi ſalués,
Si eſperdus & ſi mués
Fui, qu’onques mot ne reſpondi ;
Si que un petiot attendi,
Et puis après le ſaluay.
Mais maniere ſi fort muay
Au ſaluer, que ne ſavoie,
Se Dieus me gart, que je diſoie.
Ainſi chaſcuns me rapportoit
Choſe qui mon cuer enortoit
D’oublier ma dame de pris,
Que j’aim, criem, ſers, & loe & pris.
Nés, en alant parmi la rue,
Chaſcuns un eſcrabot m’en rue,[2]
En diſant, & par moquerie :
« Je voy tel qui a bel amie. »
Ainſi chaſcuns me rigoloit,
Pour ce que ma dame voloit
Page:Machaut - Le Voir Dit, 1875.djvu/361
Le texte de cette page a été corrigé et est conforme au fac-similé.
[vers 7581]
307
DU VOIR-DIT.
