« Ainſi le croy, ſe Dieus m’amant.
« Faites li ſavoir, ſans muſer ;
« Et s’elle ſe puet eſcuſer,
« Si ſoie hors de la villonnie.
« Et ſi, doit-on oïr partie,
« Car bons juges jà ne ſera
« Qui partie n’eſcoutera.
« Et vous la voulez condampner
« Et de voſtre grace planer,
« Pour .iii. ou pour .iiii. paroles
« Qui font menſonges & frivoles
« Plus que ſerpens envenimées,
« Et de meſdiſans controuvées !
« C’eſt grans pechiés de ſi toſt croire,
« Et plus grans dou dire. Une hiſtoire
« Vous en vueil dire & raconter
« Se vous me voulez eſcouter.[1] »
Li Corbiaus jadis plume blanche
Avoit plus que la noif ſur branche,
Ne que coulon, gante, ne cine,
Ne que la fleur de l’aube-eſpine.
Brief en li n’avoit riens de lait,
Car il eſtoit plus blans que lait.
Phebus l’amoit moult chierement,
Et y prenoit esbatement
Plus qu’en ſon arſon n’en ſa harpe,
Dont il s’esbat ſouvent & harpe.
Or vous diray comment ç’avint
Que ſa blancheur noire devint.
- ↑ Ovidii Metamorphoſ., lib. II, vers 542–632.
