Quant ma dame ma lettre oÿ,
Tout en l’eure qu’elle entroÿ
Les paroles & le rapport
Qu’on avoit conté de ſon port,
Ma lettre li chéi des mains,
N’onques, par ſemblant, corps humains
Ne ſenti ſi dure dolour ;
Car tantoſt ſa fine coulour
Blanche & vermeille fu deſtainte,
Et en coulour de morte tainte :
Sus un lit chéoir ſe laiſſa,
Son chief & ſon vis abaiſſa.
Là plouroit moult piteuſement,
Et ſouſpiroit parfondement,
Et en ſa dolente penſée
Fiſt ceſte chancon baladée :
Cent mille fois esbahie,
Plus dolente & courrecie
Suis que nulle voirement,
Quant de cellui proprement
Je ſuis de tous poins guerpie
Qui & ſa dame & s’amie
Me clamoit ſi doucement.
Car à mon gré mieus eſlire,
Qui plus me déuſt ſouffire,
Ne pourroie nul choiſir
De li ; car joie ſans ire
Seroit a moy, à voir dire,
S’aſſez véoir & oïr
Pooie en ma compaignie
Son gent corps qui eſlongnie
M’a, & ſi ſoudainement,
Sans ce que aucunement
Ait en moy congnut folie,
