Page:Machaut - Le Voir Dit, 1875.djvu/421

[vers 8931]

365

DU VOIR-DIT.

« Et de toutes autres choſettes ;
« Et autant com il a de goutes
« En la mer & en yaves toutes,
« Et comme il a en mer parfonde
« De poiſſons, & par tout le monde ;
« Et comme il eſt goutes de ſanc,
« D’oile, de vin & de lait blanc,
« Et de treſtoute autre liqueur ;
« Et autretant comme li cuer
« Par les yeux ont plouré de larmes,
« Et comme il a & aura d’armes
« En paradis, en purgatoire,
« Et en enfer qui eſt ſans gloire ;
« Et com on a forgié monnoie,
« Et comme il a en dras de ſoie
« De coulours & d’uevre ſauvage
« Et comme il a en tout ouvrage
« De chanvre, de lin & de lainne,
« Deljés filz qu’on file à grant peinne ;
« Et autant comme de poil a
« Sur quanque Dieus onques créa ;
« Com il eſt plumes & cincelles,
« Mouches, mouchettes & azelles
« En tout le monde entierement,
« Einſi, ſire, tres-humblement
« Moy, mon cuer, mes afflictions,
« Par .v^e. mile milions
« Plus que je ne dis, li direz,
« Quant vous m’i recommanderez.
« Auſſi, par .v^e. mille fois
« Autant quon a menti de fois,
« Dit menſonges & fait faus tours,
« Eſpeciaument en amours,