« Moult volentiers li eſcriray,
« Et ma reſponſe vous diray ;
« Par quoy mieus en ſachiés parler,
« Quant devers li vorrés aler.
« Mais vous, ſerez mon ſecretaire,[1]
« Pour parler à point & pour taire :
« Et par tel rime mon reſcript
« Feray, comme elle m’a eſcript. »
Si qu’en preſent fis, ſans attente,
Ce rondel pour ma dame gente.
Tres-belle, riens ne m’abeliſt,
Ne donne pais, n’aligement,
Sans vous à qui ſuis ligement.
Quant vo biauté qui embeliſt
Tous dis, ne voy & vo corps gent,
Tres-belle, riens ne m’abeliſt,
Ne donne pais, n’aligement.
Et vo douceur qui adouciſt
Mes mauls & gariſt doucement,
M’eſt trop lointaine vraiement.
Tres-belle, riens ne m’abeliſt,
Ne donne pais, n’aligement,
Sans vous à qui ſuis ligement.
Ce fait, de moy ſe deſparti,
Et me laiſſa, à cuer parti