vous m’avez fais & faites tous les jours, comment que je ne vous véyſſe onques. Et s’en véés tous les jours pluſeurs meilleurs & plus biaus, ſans nulle compariſon, que je ne ſuis, qui riens ne ſuis encontre vous, ſi n’eſt penſers que vous préiſſiez à moi acertes. Toutes-voies, je pren confort, en ce que jamais ſi grant biauté comme la voſtre ne puet eſtre ſans pitié, ne ſi gentil corps ſans noble cuer, qui ne vorroit dire ne faire que loiauté & verité. Et, par Dieu, s’il avenoit autrement, vous m’ariés mort ; car ſe je avoie en ce monde un ſeul ſouhait, je ſouhaideroie que je péuſſe mon cuer & mes yeux ſaouler de vous veoir & oyr ; & ſoiés certaine — que on porroit eſpuiſier la grant mer, — & la force des fors vens arreſter, — & les nues eſclarcir ne troubler, — & la clarté du ſoleil deſtourner ; — ne porroit-on mon cuer de vous oſter — juſques à la mort, — & après mort, très-douce, en vous amer — ſeront mi fort. Et pour ce que je reſſoigne d’aler en voſtre préſence, pour les doubtes deſſus dites, je vous ſuppli encor, tant doucement comme je puis comme à ma ſouveraine dame, que vous me vueilliez envoier voſtre douce ymage au vif, & en unes petites tables. Car ſe il a lieu au monde où on la puiſt bien faire, c’eſt là ou vous eſtes.[1] Et je vous jure & promet par ma foy, que elle ſera de moi bien amée, bien gardée, honnourée, aourée ; nuit & jour enclinée, deſirée & loée ; ne à créature née ne gehiray ma penſée & m’amour. Et ſe il n’eſtoit ainſi, je ſeroie li plus faus & li plus mauvais, li plus traîtres & li plus deſnaturés qui onques fuſt, & plains du mauvais pechié que on appelle ingratitude, c’eſt-à-dire rendre mal pour bien. Car vous m’avez reſſuſcité & rendu mon ſentement que j’avoie tout perdu : & jamais par moi ne fuſt fais chans ne lais, ſe vous ne fuſſiez. Mais, ſe Dieu plaiſt & je puis, je feray, à voſtre gloire &
- ↑ On peut ſuppoſer que la demoiſelle ſéjournoit alors à Paris.
