En lit de mort ſuis à deſconfiture,
Se Dieus & vous ne me prenés en cure.
Mais certains ſuis qu’en vous de bien a tant
Que dou peril où je ſuis, ſans attente,
Me jetterés, ſe de cuer en plourant,
Priés à Dieu qu’à moi garir s’aſſente.
Et pour ce je vous depry
Qu’à Dieu pour moi vueillez faire depry ;
Ou paier crieng le tréu de Nature,
Se Dieus & vous ne me prenés en cure.
Amours, ma dame & Fortune & mi oeil,
Et la tres-grant biauté dont elle eſt plaine,
Ont mis mon cuer, ma penſée & mon vueil
Et mon deſir en ſon tres-dous demaine.
Mais Fortune ſeulement
Me ſait languir trop dolereuſement,
Et trop me ſait avoir paine & anoy,
Quant ſur tout l’aim & ſouvent ne la voy.
De ma dame, ne de ſon bel acueil,
De mes deus yeus, d’Amours, ne de ma paine
Ne me plaing pas, car par eus en l’eſcueil
Suis mis d’avoir toute joie mondaine.
Mais tout mon entendement,
Et mes bons jours & mon gay ſentement
Fortune eſtaint ; ſi, morray, par ma ſoy,
Quant ſur tout l’aim & ſouvent ne la voy.
Car Fortune, dont je me plaing & dueil,
Fait que ma dame eſt de moi trop lointaine,
Et ſi me toit Bon-eſpoir qu’avoir ſueil,
Et Deſeſpoir dedans mon cuer amaine :
Ainſi ſans alegement
Vif pour ma dame à qui ſuis ligement ;
