ne sera jamais tant estimee comme l’original, sur lequel on aura prins le pourtrait. Parquoy, les colomnes de pierre ne se peuuent glorifier contre celles de bois, ne dire, nous sommes plus parfaites, et ce, d’autant que celles de bois ont engendré, ou pour le moins ont aprins à faire celles de pierre. Et puis que le Souuerain Geometrien, et premier edificateur y a mis la main, il les faut plus estimer que celles des pierres, quelques rares qu’elles soyent, hors-mis qu’elles fussent de pierre de iaspe, ou d’autres pierres rares.
Voire, mais les colomnes des pierres qui ont esté insculpees par nos anciens edificateurs, ont chacune vn chapiteau, pour imiter la teste de l’humaine nature : Aussi les anciens edificateurs ont insculpé au pied d’vne chacune desdites colomnes, vne base, qui signifie le pied de l’homme. Et quand ceux de Corinthe inuenterent leurs genres de colomnes, desquelles ils edifierent le Temple de la grand Diane, qui estoit un merueilleux bastiment, ils firent au corps de leurs colomnes certains canaux, et voyes creuses, qui denotoyent les plis et froncis des robes et cotes de leur Deesse Diane : Aussi au chapiteau de leurs colomnes, ils mirent certains rouleaux, façonnez en maniere d’vne ligne aspiralle, lesquels entortillemens signifioyent les cheueux et coiffure de ladite Diane. Voila comment nos anciens edificateurs n’ont rien fait sans grande consideration, et raison bien asseuree : mais toy, quelle raison, mesure, ni ordre pourrois-tu tenir à ton bastiment fait de pieds et branches d’hommeaux, veu que lesdits hommeaux augmentent tous les iours en grosseur et hauteur ?
Pour vray, ie pense que tu as vne teste sans ceruelle : n’as-tu point considéré tant de beaux iardins, qui sont en France, ausquels les iardiniers ont tondu les romarins, lizos, et plusieurs autres especes d’herbes, les vnes auront la forme d’vne grue, les autres la forme d’vn coq, les autres la forme d’vne oye, et consequemment de plusieurs autres especes d’animaux : et mesme, i’ay veu en certains iardins, qu’on a fait certains gens-d’armes à cheual et à pied, et grand nombre de diuerses armoiries, lettres, et deuises : mais toutes ces choses sont de peu de duree, et les faut refaçonner souuent.
