J’y persiste et y persisteray tant que ie viuray : car ie sçay que mon dire est veritable, que l’eau ne se peut geler au fond de la riuiere que premierement toute la superficie ne soit gelee, et qu’elle n’aye entierement perdu son cours : et suis fort aise que tu m’as reproché vn tel propos : par ce qu’il me seruira d’argument pour prouuer que si en vne chose visible et aisee à connoistre vne si grande multitude d’hommes soustiennent le contraire de verité, disans que les glaçons que la riuiere porte ont esté gelez au fond d’icelle, combien plus se peuuent ils estre abusez és choses interieures, comme ils ont fait du restaurant d’or, qui m’a incité à disputer du Mitridat.
Ne sçais tu pas que plusieurs t’ont maintenu en barbe qu’en temps de gelee ils voyent ordinairement monter les glaçons du fond de l’eau ? Ne sçais-tu pas aussi que plusieurs gens doctes t’ont maintenu par raisons philosophiques (que tu n’as sçeu conuaincre) que cela estoit veritable ?
Tant plus tu veux confondre mon dire, et plus ie suis asseuré en mon opinion, et n’y a homme en ce monde qui m’en sceut faire rougir, car ie sçay qu’il est impossible que les glaces puissent estre formees au fond de l’eau.
Mais puis que tes contraires t’alleguent raisons naturelles tu deusses aussi produire les tiennes en auant : afin que l’on conneut si elles sont meilleures que les leurs.
Si ie me voulois estudier à chercher les raisons, i’en trouuerois vn millier de plus suffisantes que non pas celles que mes contredisants alleguent. Premierement il faut tenir pour chose certaine que si les riuieres se glaçoyent au fond, comme ils disent, que tous les poissons qui sont en l’eau mourroyent, et de cela n’en faut douter. Il ne se trouueroit glaçon montant de l’eau qui ne fut tout lardé de poissons. Ie croy que tu ne connois pas quels sont les effects mortels des glaces : leur action pernicieuse est telle que comme l’eau se conglace, elle fait vne compression si grande, que les choses qui sont meslées parmy icelle ne la peuuent endurer, mesmement les cho-
