quand ils en ont, ils l’augmentent et accroissent du leur : ceux des Ardennes sçauent tres-bien que le sel de Xaintonge est meilleur que celuy de Lorraine, et pour ces causes ils sont soigneux d’en auoir : ils le connaissent à la couleur et grosseur : car les grains du sel qui est congelé au soleil sont plus gros que de celuy qui est fait au feu, et faut croire que le sel de Xaintonge est aussi blanc que nul autre sçauroit estre : Mais par ce que la terre des marez est noire, ceux qui font le sel ne le peuuent tirer hors des aires sans racler et entremeler quelque peu de terre : ce qui luy oste vne partie de sa blancheur : toutesfois quand les sauniers commencent à faire du sel, ils en font d’aussi blanc que neige, pour seruir à table, et en font des presens à leurs parents et amis, qui sont espars és terres douces. Ils prennent ledit sel blanc tout dessus, auant que de racler iusques au fond, et sans esmouuoir rien de laditte terre. Ce n’est donc pas la faute de l’eau, que le sel de Xaintonge ne soit aussi blanc que celuy des autres pays. Et ne faut plus auoir opinion qu’il s’en face de l’escume de la mer, ainsi que l’on l’a creu iusques auiourd’huy.
Le Sel blanchit toutes choses.
Et donne ton à toutes choses.
Et si fortiffie toutes choses.
Et si est compagnon de toutes natures.
Et si entretient l’amitié entre le masle et la femelle.
Et si aide à la generation de toutes choses animées et vegetatiues.
Il empesche la putrefaction et endurcist toutes choses.
Il aide à la veüe et aux lunettes.
Sans le sel, il seroit impossible de faire aucune espece de verre.
Toutes choses se peuuent vitrifier par sa vertu.
Il donne goust à toutes choses.
Il aide à la voix de toutes choses animées, voire à toutes especes de metaux, et instruments de musique.
