Page:Palissy - Oeuvres complètes (P. A. Cap, 1844).djvu/61

our auoir plus facile intelligence du present discours, nous le traiterons en forme de Dialogue, auquel nous introduirons deux Personnes, l’une demandera, l’autre respondra comme s’ensuit.

Puisque nous sommes sur les propos des honnestes delices et plaisirs, ie te puis asseurer, qu’il y a plusieurs iours que i’ay commencé à tracasser d’vn costé et d’autre, pour trouuer quelque lieu montueux, propre et conuenable pour edifier vn iardin pour me retirer, et recreer mon esprit en temps de diuorces, pestes, epidimies, et autres tribulations, desquelles nous sommes à ce iourd’huy grandement troublez.

Demande.

Ie ne puis clairement entendre ton dessein, parce que tu dis que tu cerches vn lieu montueux, pour faire vn iardin delectable. C’est vne opinion contraire à celle de tous les Antiques et Modernes ; car ie sçay qu’on cerche communement les lieux planiers, pour edifier iardins : aussi sçay-je bien que plusieurs ayans des bosses et terriers en leurs iardins, se sont constituez en grands fraits pour les applanir. Quoy consideré, ie te prie me dire la cause qui t’a meu de cercher vn lieu montueux pour édifier ton iardin.

Responce.

Quelques iours apres que les esmotions et guerres ciuiles furent appaisees, et qu’il eut pleu à Dieu nous enuoyer sa paix, i’estois vn iour me pourmenant le long de la prairie de ceste ville de Xaintes, près du fleuue de Charante : et ainsi que ie contemplois les horribles dangers, desquels Dieu m’auoit garenti au temps des tumultes et horribles troubles passez, i’ouy la voix de certaines vierges, qui estoyent assises sous certaines aubarees^[1], et chantoyent le Pseaume cent quatriesme. Et parce que leur voix estoit douce et bien accordante, cela me fit oublier mes premières pensees, et m’estant arresté pour escouter ledit Pseaume, ie laissay le plaisir des voix, et entray en contemplation sur le sens dudit Pseaume, et ayant noté

1. Plantations d’aubiers (alburnum).