Item, comment cognoistra vn laboureur la différence des terres, sans Philosophie ? Les vnes sont propres pour les froments, les autres pour les pois, et autres pour les febues. Les febues creuës en vn champ sont cuisantes, et, tout auprès d’icelles, y aura vn autre champ, duquel les febues qui y seront produites, ne seront iamais cuisantes : pareillement en est-il de toutes especes de legumes. Aussi il y a des eaux, desquelles les legumes ne pourront cuire, et il y a d’autres eaux, desquelles les légumes seront cuisans. Brief, il est impossible de te pouuoir reciter, combien la Philosophie naturelle est requise aux agriculteurs. Et ce n’est sans cause, que ie t’ay mis ces propos en auant : car les actes ignorans que ie voy tous les iours commettre en l’art d’agriculture, m’ont causé plusieurs fois me tourmenter en mon esprit, et me cholerer en ma seule pensée, parce que ie voy qu’vn chacun tasche à s’agrandir, et cerche des moyens pour succer la substance de la terre, sans y trauailler, et cependant on laisse les pauures ignares pour le cultiuement de la terre, dont s’en ensuit, que la terre et ce qu’elle produit est souvent adulterée, et est commise grande violence ès bestes bouines, que Dieu a créées pour le soulagement de l’homme.
Ie te prie me monstrer quelque faute commise en l’agriculture, à fin de me faire croire ce que tu dis.
Quand tu iras par les villages, considere vn peu les fumiers des laboureurs, et tu verras qu’ils les mettent hors de leurs estables, tantost en lieu haut, et tantost en lieu bas, sans aucune consideration, mais qu’il soit appilé, il leur suffît : et puis, pren garde au temps des pluyes, et tu verras que les eaux qui tombent sur lesdits, emportent vne teinture noire, en passant par ledit fumier, et trouuant le bas, pente, ou inclinaison du lieu où les fumiers seront mis, les eaux qui passeront par lesdits fumiers, emporteront ladite teinture, qui est la principale, et le total de la substance du fumier. Parquoy, le fumier ainsi laué, ne peut seruir, sinon de parade : mais estant porté au champ, il n’y fait aucun profit. Voila pas doncques vne ignorance manifeste, qui est grandement à regretter ?
