yleques ot bataille fort et dure et y fu pris messire Thomas Dagorn. Si avint que si comme il le vouloient mener aus tentes du duc, il orent à l’encontre d’eulz une autre bataille qui leur rescoust ledit messire Thomas, et commença derechief la bataille. Et n’estoit pas encore jour, mais faisoit moult oscur et en telle maniere que les noz s’entretuoient pour ce qu’il ne s’entrecognoissoient, tant faisoit oscur. Mais les anemis si avoient i signe secret, comme devant est dit, si s’entregardoient. En ycelle bataille fu pris derechief messire Thomas Dagorn de la propre main du duc. En yce lieu avoit moult de diverses batailles, et estoient les unes assez près des autres, et se combatoient à la clarté des cierges et des torches. Le visconte de Roquan[1] se combatoit, le seigneur de Vauguion et pluseurs autres seigneurs se combatoient en diverses places et lieux. Quant les Anglois virent que messire Thomas Dagorn estoit derechief pris, si s’en partirent aucuns de l’ost et s’en vindrent à ceulz de la Roche Derian, et les requistrent qu’il les vousissent secourir et aidier. Adonques ceulz de la ville et du chastel issirent atout une maniere de haches, lesquelles estoient bonnes et avoient manches de ii piez et demi de lonc ou environ, et issirent bien environ vc hommes, fors et delivres combatanz tant de la ville comme du chastel, et se ferirent en l’ost du duc et des autres qui se combatoient, et recoustrent derechief ledit messire Thomas, et mistrent à mort moult de ceulz de la partie du duc, de leurs dittes haches. Mais ceulz que le duc avoit ordenez pour estre au lieu qui est dit la Place
- ↑ Le vicomte de Rohan.
