◄ Laisse CCCXXII | Laisse CCCXXIII | Laisse CCCXXIV ► |
Dist l’emperer : « Bien vos en pri, signor,
« Ch’a cist besoin soieç de grant valor.
« Cevaucerés un poi avant l’aubor.
— Cunbien de jent », dist Rolant le contor,
« Nos donreç vos por encontrer li lor ?
« Car de la jent dunt je sui senator
« N’en voil mener auchun a cist labor,
« Car l’apostoile me proia por amor
« Che sa masnee, dunt m’a feit condutor,
« Ne amoinase o il aüst desonor.
« Voir je ai bien quatre mil de celor
« Chi por humaje me servent noit e jor :
« De cil n’en pois avoir nule peior ;
« Cil amenrai vers la jent Paienor.
— Niés », dit li roi, « vos parleç dou melor,
« Je vos donrai de ma jeste Francor
« Quatre mil autres chi sunt mei servitor.
— Grant mercié, sire », ce dist le pugneor.
« Rien che soit dite ne meteç an iror. »
Lor les acole le roi por grant douçor,
Pois vunt colçer li grans e li minor.