| ◄ Laisse CCLXII | Laisse CCLXIII | Laisse CCLXIV ► |
Le latiner dou palés devala ;
Son palefroi dui Pagien li mena.
Quant fu monté, la porte el pont passa ;
Damediex proie, qui tot le mond crea,
Hestous confunde, qu’ensi le spoenta ;
Ja por son gré jor de prison n’istra.
Tant ha eré que a l’ost ariva ;
Au tref desent ou l’enperer trova ;
Grant fu la presse qu’entor lui s’arota.
Lor conte ou roi tot si con il parla
A Maugeris, que asés l’escouta :
« Bien vos sai dire que tant com il pora
« Son Deu ne sa cité nus jors non guerpira
« Ni rois Marsille son sir non boisera ;
« Ains vos menace que gaire non ira
« Que sor le geu les dés vos cangera.
« Je li dis tant qe il s’en coroça.
« Je qu’en diroie ? Por Hestous envoia,
« Le plus faus home c’onque fu ne sera.
« Quatre Paien ou palés l’en mena.
« Et je avoie ou roi ja dit pieça
« Que je avoie dus Hostous leisiés ça,
« E Maugeris tantost por lui manda.
« Quant je le vi, grant joie m’en doubla ;
« Lor le cinai, mais petit me monta,
« E dis ou roi : « De Hostous ci point non a ;
« Unques cestui mon seignor non parla
« N’ainch en sa cort non bevi ni menga. »
« Si vos veisés con Hostous rohella
« Les oil sor moi ! Por pué ne me tua.
« Desmanti moi e ribaut me clama ;
« Dist che en sa vie nul hom tant ni dota
« Ch’il soi celast ne chi lui enjendra ;
« Par plus de prove ses seiel li mostra
« E de moi pandre roi Maugeris rova.
« Poi che ma mere de moi se delivra,
« Si grant paors mon cor ne visita.
« Maugeris mande che, se suen fil avra,
« Le maleoit Hestous delivrera. »
Rollant s’en rit ; le roi en regarda.