◄ Laisse CCX | Laisse CCXI | Laisse CCXII ► |
Li quens Hestos fu pros e de bon aire ;
Il voit li roys talentis de mal faire,
Si avoit nus son chief e son visaire,
Car al verser l’eume remist en l’aire,
E voit Paiens venir, crïer e braire
Plus de troi mil, qe ne l’amoient gaire ;
N’i avoit aïe d’ome, fors qe contraire.
Ai ! quant regrete Rollant, son mestre maire :
« Se fuses ci, gentil niés d’emperaire,
« Ne feisis couse qe or me l’estuet faire :
« Pres voi ma mort, pres voi mon aversaire ;
« Se oncir me lais, je ferai qe pecaire. »
Lors dist au roy : « Ne toi doie desplaire,
« Quel home eis, e de com feit afaire ?
« S’is gentils home, rendrai moi senz forfaire ;
« Chouse qe non, en sus te convient traire :
« Par tot la tere qe fu a le roi Daire
« Non me rendroie, ainz me laisas detraire. »