◄ Laisse CXLI | Laisse CXLII | Laisse CXLIII ► |
CXLII[1]
Feragu sist an mé la praerie,
Dejoste lui son hiaume de Sorie,
Car de Rollant ne se redote mie ;
N’i mesferoit s’avant ne le desfie.
Par la calor contre terre se plie,
Panse e rapanse a la grant vigorie
Ch’el a trové en Rollant celle fie ;
Ne trova mais hom de si grant hautie.
Lors s’endormi par la grant ahastie ;
Le cief torna vers senestre partie,
Desor son braç mist le chief e l’oïe.
Quant s’endormi, sachiez que mout se fie
En nostre duc et en sa cortesie,
Che mais ne fu retret de vilanie.