| ◄ Laisse DCXLIV | Laisse DCXLV | Laisse DCXLVI ► |
Dejoste une fontaine, qi sort soz un arbor,
Descenderent li dui, e li angle aveq lor,
E tolirent li frans as chevas milsoudor.
Li du pasturent l’erbe e le terz flaire entor :
Senblant feit de mangier, mais ce fu van color.
L’angle s’asist sor l’erbe, e le fiuz l’aumensor
Qui qidoit bien ce fust Rolant le poigneor,
Car son semblant avoit, sa façe e son color.
A un pomer sovaje vient Hues le contor.
« J’en manjurai », feit il, « ou le Jesus honor. »
Une en mist a sa boche, e senti un oudor
Q’a tot jor de sa vie n’en senti un greignor ;
A ses dent le peça, sin insi un sabor
Teil qe de la mervoille il se garda d’entor.
A l’angle e a Sanson en a portés plusor
E li dit dousemant : « Menjués, mon segnor,
« De le plus noble frut qe l’en trovast ancor.
« Voiremant tel fu cil qe le nostre ançesor
« Menjua por conseil de sa chative oisor.
« Nen somes aveüs qe le mangie pastor ;
« En Paradis terestre nos a menés cist jor.
« Se j’en iere creüs, por Deu le creator,
« Jamais ne partirons, car il seroit follor. »