| ◄ Laisse LXXXI | Laisse LXXXII | Laisse LXXXIII ► |
Fol est celui chi son nemi desprise,
Por tant ch’il soie d’une petite guise,
Pobre d’avoir e neïs en chemise,
Car le proverbe seult dir che maestrise
Confont ceschuns ch’en li force s’atise.
Dam Feragu ch’avoit fet la grant prixe
De cil por qué abasoit sante Glixe
Tost le perdi por divine justixe.
No s’en gardoit par orguel de fantise,
Si com le fols que croit prandre la bise
Avec la palme, dunt autrui s’en feit rixe ;
Si com celui qui par grant avarise
Tient trop a vendre la grant mercheandise,
Pués perd a tens tote la convotise,
Dolant se clame e feit chiere pansise,
Tot ensemant le Paiens de Galise
Remist plains d’ire, de duel e de reprise.
Pués apella le filz a la marchise :
« Amis Rollant, trosqu’al jor do juïse
« Sera parlé de vostre grant franchise,
« Che par engins e force avez la mort aquise ;
« Greignor nomee avez enchué conquise
« Sol d’escamper de mes mains en tiel guise
« Che se tot seul eüsez Rome asise.
« Mais avant che Spagne soit soz vos mise,
« Ensanglenties i avront mante chemise
« E mantes dames perdront lor druerise ;
« Asés pulcelles qu’a barons sont promise
« Par trop atendre feront la crine grise ;
« Tant i avra de vostre gent oncise
« Ch’en perdra Françe la sa grant gentilise.
« Por Mauchomet, fet avez fole enprise. »