La Chanson de Roland/Léon Gautier/Édition critique/Première partie/Texte
À SARAGOSSE. — CONSEIL TENU PAR LE ROI MARSILE
1Carles li Reis, nostre emperere magnes,
Set anz tuz pleins ad estet en Espaigne :
Cunquist la tere tresqu’en la mer altaigne.
N’i ad castel ki devant lui remaigne ;
5Murs ne citez n’i est remés à fraindre
Fors Sarraguce, ki est en une muntaigne.
Li reis Marsilies la tient, ki Deu n’enaimet ;
Mahumet sert e Apollin recleimet :
Ne s’ poet guarder que mals ne li ataignet. Aoi.
10Li reis Marsilies esteit en Sarraguce :
Alez en est en un verger suz l’umbre ;
Sur un perrun de marbre bloi se culchet,
Envirun lui plus de vint milie humes.
Il en apelet e ses dux e ses cuntes :
15« Oez, seignurs, quel pecchet nus encumbret :
« Li emperere Carles de France dulce
« En cest païs nus est venuz cunfundre.
« Jo nen ai ost ki bataille li dunet,
« Ne n’ai tel gent ki la sue derumpet.
20« Cunseilez mei, cume mi saive hume ;
« Si me guarisez e de mort e de hunte. »
N’i ad païen ki un sul mot respundet
Fors Blancandrin de l’ castel de Val-Funde. Aoi.
Blancandrins fut des plus saives païens :
25De vasselage fut asez chevalers,
Prozdom i out pur sun seignur aider.
E dist al Rei : « Ore ne vus esmaiez.
« Mandez Carlun, al orguillus e al fier,
« Fedeilz servises e mult granz amistez :
30« Vus li durrez urs e leuns e chens,
« Set cenz cameilz e mil hosturs muez,
« D’or e d’argent .iiii. c. muls cargez,
« Cinquante carres qu’en ferat carier :
« Ben en purrat luer ses soldeiers.
35« En ceste tere ad asez osteiet,
« En France ad Ais s’en deit bien repairer.
« Vus le siurez à la feste seint Michel :
« Si receverez la lei de chrestiens,
« Serez sis hom par honur e par ben.
40« S’en voelt ostages, e vus l’en enveiez
« U dis u vint pur lui afiancier.
« Enveiums i les filz de noz muillers ;
« Par num d’ocire i enveierai le men.
« Asez est melz qu’il i perdent les chefs
45« Que nus perdum l’honur ne la deintet,
« Ne nus seium cunduit à mendeier. » Aoi.
Dist Blancandrins : « Par ceste meie destre,
« E par la barbe ki al piz me ventelet,
« L’ost des Franceis verrez sempres desfere :
50« Franc s’en irunt en France la lur tere.
« Quant cascuns ert à sun meillur repaire,
« Carles serat ad Ais, à sa capele,
« A seint Michel tendrat mult halte feste.
« Vendrat li jurz, si passerat li termes,
55« N’orrat de nus paroles ne nuveles.
« Li Reis est fiers, e sis curages pesmes :
« De noz ostages ferat trencher les testes ;
« Asez est melz qu’il i perdent les testes,
« Que nus perdum clere Espaigne la bele,
60« Ne nus aium les mals ne les suffraites. »
Dient païen : « Issi poet-il ben estre. » Aoi.
Li reis Marsilies out sun cunseill finet :
Si’n apelat Clarin de Balaguet,
Estamarin e Eudropin sun per,
65E Priamun e Guarlan le barbet,
E Machiner e sun uncle Maheu,
E Joïmer e Malbien d’ultre-mer,
E Blancandrin, pur la raisun cunter :
Des plus feluns dis en ad apelez.
70« Seignurs baruns, à Carlemagne irez ;
« Il est al siège à Cordres la citet.
« Branches d’olive en voz mains porterez :
« Ço senefiet pais e humilitet.
« Par voz saveirs se m’ puez acorder,
75« Jo vus durrai or e argent asez,
« Teres et fieus tant cum vus en vuldrez. »
Dient païen : « De ço avum nus asez. » Aoi.
Li reis Marsilies out finet sun cunseill.
Dist à ses humes : « Seignurs, vus en ireiz ;
80« Branches d’olive en voz mains portereiz :
« Si me direz à Carlemagne le Rei
« Pur le soen Deu qu’il ait mercit de mei ;
« Ja einz ne verrat passer cest premer meis
« Que je l’ siurai od mil de mes fedeilz.
85« Si receverai la chrestiene lei,
« Serai sis hom par amur e par feid.
« S’il voelt ostages, il en averat par veir. »
Dist Blancandrins : « Mult bon plait en avereiz. » Aoi.
Dis blanches mules fist amener Marsilies,
90Que li tramist li reis de Suatilie.
Li frein sunt d’or, les seles d’argent mises.
Cil sunt muntez ki le message firent ;
Enz en lur mains portent branches d’olive.
Vindrent à Carle ki France ad en baillie,
95Ne s’ poet guarder que alques ne l’ engignent... Aoi.
À CORDRES. — CONSEIL TENU PAR CHARLEMAGNE
Li Emperere se fait e balt e liet :
Cordres ad prise e les murs peceiez,
Od ses cadables les turs en abatiet.
Mult grant eschec en unt si chevaler
100D’or e d’argent e de guarnemenz chers.
En la citet nen ad remés paien
Ne seit ocis u devient chrestiens.
Li Emperere est en un grant verger,
Ensembl’od lui Rollanz e Olivers,
105Sansun li Dux e Anséis li fiers,
Gefreis d’Anjou li reis gunfanuners ;
E si i furent e Gerins e Gerers :
Là ù cist furent, des altres i out ben.
De dulce France i ad quinze milliers.
110Sur palies blancs siedent cil chevaler,
As tables juent pur els esbaneier,
E as eschecs li plus saive e li veill ;
E escremissent cil bacheler leger.
Desuz un pin, delez un eglenter,
115Un faldestoed i out, fait tut d’or mer,
Là siet li reis ki dulce France tient ;
Blanche ad la barbe e tut flurit le chef,
Gent ad le cors e le cuntenant fier.
S’est ki l’demandet, ne l’estoet enseigner.
120E li message descendirent à pied,
Si l’saluèrent par amur e par ben. Aoi.
Blancandrins ad tut premereins parlet,
E dist al Rei : « Salvez seiez de Deu,
« Le Glorius, que devez aürer !
125« Iço vus mandet reis Marsilies li bers :
« Enquis ad mult la lei de salvetet ;
« De sun aveir vus voelt asez duner,
« Urs e leuns e veltres enchaignez,
« Set cenz cameilz e mil hosturs muez,
130« D’or e d’argent .iiii. cenz muls trussez,
« Cinquante carres que carger en ferez ;
« Tant i averat de besanz esmerez
« Dunt ben purrez voz soldeiers luer…
« En cest païs avez estet asez,
135« En France ad Ais devez ben repairer ;
« Là vus siurat, ço dit mis avoez. »
Li Emperere en tent ses mains vers Deu ;
Baisset sun chef, si cumencet à penser. Aoi.
Li Emperere en tint sun chef enclin,
140De sa parole ne fut mie hastifs,
Sa custume est qu’il parolet à leisir.
Quant se redrecet, mult par out fier le vis.
Dist as messages : « Vus avez mult ben dit.
« Li reis Marsilies est mult mis enemis.
145« De cez paroles que vus avez ci dit
« En quel mesure en purrai estre fiz ? »
« — Voelt par ostages, ço dist li Sarrazins,
« Dunt vus averez u dis u quinze u vint.
« Par num de ocire i metrai un men filz,
150« E si’n averez, ço quid, de plus gentilz.
« Quant vus serez el palais seignurill,
« A la grant feste seint Michel del Peril,
« Mis avoez là vus siurat, ço dit,
« Enz en voz bainz que Deus pur vus i fist ;
155« Là vuldrat il chrestiens devenir. »
Carles respunt : « Uncore purrat guarir. » Aoi.
Bels fut li vespres e li soleilz fut clers.
Les dis mulez fait Carles establer.
El grant verger fait li Reis tendre un tref ;
160Les dis messages ad fait enz hosteler ;
Xii. serjant les unt ben cunreez.
La noit demurent tresque vint al jur cler.
Li Emperere est par matin levez ;
Messe e matines ad li Reis escultet.
165Desuz un pin en est li Reis alez,
Ses baruns mandet pur sun cunseill finer :
Par cels de France voelt il de l’ tut errer. Aoi.
Li Emperere s’en vait desuz un pin,
Ses baruns mandet pur sun cunseill fenir :
170Le duc Oger e l’arcevesque Turpin,
Richard le veill e sun nevuld Henri,
E de Guascuigne le proz cunte Acelin,
Tedbald de Reins e Milun sun cusin.
E si i furent e Gerers e Gerins,
175Ensembl’ od els li quens Rollanz i vint
E Olivers, li proz e li gentilz ;
Des Francs de France en i ad plus de mil ;
Guenes i vint, ki la traïsun fist.
Dès ore cumencet li cunseill que mal prist. Aoi.
180« Seignurs baruns, dist li emperere Carles,
« Li reis Marsilies m’ad tramis ses messages ;
« De sun aveir me voelt duner grant masse,
« Urs e leuns e veltres caeignables,
« Set cenz cameilz e mil hosturs muables,
185« Quatre cenz mulz cargez de l’or d’Arabe,
« Avoec iço plus de cinquante carres ;
« Mais il me mandet que en France m’en alge :
« Il me siurat ad Ais à mun estage,
« Si receverat la nostre lei plus salve ;
190« Chrestiens ert, de mei tendrat ses Marches ;
« Mais jo ne sai quels en est sis curages. »
Dient Franceis : « Il nus i cuvent guarde. » Aoi.
Li Emperere out sa raisun fenie.
Li quens Rollanz, ki ne l’ otriet mie,
195En piez se drecet, si li vint cuntredire.
Il dist al Rei : « Ja mar crerez Marsilie.
« Set anz ad pleins qu’ en Espaigne venimes ;
« Jo vus cunquis e Noples e Commibles,
« Pris ai Valterne e la terre de Pine,
200« E Balaguet e Tuele e Sezilie :
« Li reis Marsilies i fist mult que traïtres :
« De ses païens il vus enveiat quinze :
« Cascuns porteit une branche d’olive ;
« Nuncerent vus cez paroles méismes.
205« A voz Franceis un cunseill en presistes,
« Loèrent vus alques de legerie.
« Dous de voz cuntes al païen tramesistes,
« L’uns fut Basanz e li altre Basilies ;
« Les chefs en prist ès puis desuz Haltoïe.
210« Faites la guere cum vus l’avez enprise,
« En Sarraguce menez vostre ost banie,
« Metez le siège à tute vostre vie,
« Si vengez cels que li fels fist ocire. » Aoi.
Li Emperere en tint sun chef enbrunc,
215Si duist sa barbe, afaitat sun gernun,
Ne ben ne mal ne respunt sun nevuld.
Franceis se taisent, ne mais que Guenelun :
En piez se drecet, si vint devant Carlun,
Mult fièrement cumencet sa raisun,
220E dist al Rei : « Ja mar crerez bricun,
« Ne mei ne altre, se de vostre prod nun.
« Quant ço vus mandet li reis Marsiliun
« Qu’il devendrat jointes ses mains vostre hum,
« E tute Espaigne tendrat par vostre dun,
225« Puis receverat la lei que nus tenum.
« Ki ço vus lodet que cest plait degetum,
« Ne li chalt, Sire, de quel mort nus murrum.
« Cunseill d’orguill n’est dreiz que à plus munt.
« Laissum les fols, as sages nus tenum. » Aoi.
230Après iço i est Neimes venuz,
Meillur vassal n’aveit en la curt nul ;
E dist al Rei : « Ben l’avez entendut,
« Guenes li quens ço vus ad respundut :
« Saveir i ad, mais qu’il seit entenduz.
235« Li reis Marsilies est de guere vencuz,
« Vus li avez tuz ses castels toluz,
« Od voz cadables avez fruiset ses murs,
« Ses citez arses e ses humes vencuz.
« Quant il vus mandet qu’aiez mercit de lui,
240« Pecchet fereit ki dunc li fesist plus,
« U par ostages vus en voelt faire soür ;
« Ceste granz guere ne deit munter à plus. »
Dient Franceis : « Ben ad parlet li dux. » Aoi.
« Seignurs baruns, ki i enveierum
245« En Sarraguce al rei Marsiliun ? »
Respunt dux Neimes : « Jo irai par vostre dun ;
« Liverez m’en ore le guant e le bastun. »
Respunt li Reis : « Vus estes saives hum ;
« Par ceste barbe e par cest men gernun,
250« Vus n’irez pas uan de mei si luign ;
« Alez sedeir quant nuls ne vus sumunt. » Aoi.
« Seignurs baruns, ki i purrum enveier
« Al Sarrazin ki Sarraguce tient ? »
Respunt Rollanz : « Jo i puis aler mult ben. »
255« — Ne l’ ferez certes, dist li quens Olivers,
« Vostre curages est mult pesmes e fiers :
« Jo me crendreie que vus vus meslisez.
« Se li Reis voelt, jo i puis aler ben. »
Respunt li Reis : « Ambdui vus en taisez,
260« Ne vus ne il n’i porterez les piez.
« Par ceste barbe que veez blancheier,
« Li duze Per mar i serunt juget ! »
Franceis se taisent, as les vus aquisez. Aoi.
Turpins de Reins en est levez del renc,
265E dist al Rei : « Laisez ester voz Francs.
« En cest païs avez estet set anz,
« Mult unt oüt e peines e ahans.
« Dunez m’en, Sire, le bastun e le guant,
« E jo irai al Sarazin Espan,
270« Si’n vois vedeir alques de sun semblant. »
Li Emperere respunt par maltalant :
« Alez sedeir desur cel palie blanc ;
« N’en parlez mais, se jo ne l’ vus cumant. » Aoi.
« Franc chevaler, dist li emperere Carles,
275« Car m’eslisez un barun de ma Marche,
« Qu’à Marsiliun me portast mun message. »
« Ço dist Rollanz : « Ço ert Guenes, mis parastre. »
Dient Franceis : « Car il le poet ben faire ;
« Se lui lessez, n’i trametrez plus saive. »
280E li quens Guenes en fut mult anguisables ;
De sun col getet ses grandes pels de martre,
E est remés en sun blialt de palie.
Vairs ont les oils e mult fier le visage,
Gent out le cors e les costez out larges ;
285Tant par fut bels, tuit si per l’en esgardent.
Dist à Rollant : « Tut fol, pur quei t’esrages ?
« Ço set hom ben que jo sui tis parastre ;
« Si as juget qu’à Marsiliun en alge.
« Se Deus ço dunet que jo de là repaire,
290« Jo t’en muverai un si grant cuntraire
« Ki durerat à trestut tun edage. »
Respunt Rollanz : « Orguill oi e folage.
« Ço set hom ben, n’ai cure de manace ;
« Mais saives hom il deit faire message ;
295« Si li Reis voelt, prez sui pur vus le face. »Aoi.
Guenes respunt : « Pur mei n’iras tu mie.
« Tu n’es mis hom ne jo ne sui tis sire.
« Carles cumandet que face sun servise,
« En Sarraguce en irai à Marsilie ;
300« Einz i ferai un poi de legerie
« Que jo’n esclair ceste meie grant ire. »
Quant l’ot Rollanz, si cumençat à rire. Aoi.
Quant ço veit Guenes que ore s’en rit Rollanz,
Dunc ad tel doel, pur poi d’ire ne fent,
305A ben petit que il ne pert le sens,
E dit al cunte : « Jo ne vus aim nient ;
« Sur mei avez turnet fals jugement.
« Dreit Emperere, veez me ci en present,
« Ademplir voeill vostre cumandement. Aoi.
310« En Sarraguce sai ben qu’ aler m’estoet ;
« Hom ki là vait repairer ne s’en poet.
« Ensurquetut si ai jo vostre soer,
« Si’n ai un fil, ja plus bels n’en estoet :
« Ço est Baldewins, ço dit, ki ert prozdom.
315« A lui lais jo mes honurs e mes fieus.
« Guardez le bien, ja ne l’ verrai des oilz. »
Carles respunt : « Trop avez tendre coer.
« Puis que l’ cumant, aler vus en estoet. »Aoi.
Ço dist li Reis : « Guene, venez avant ;
320« Si recevez le bastun e le guant.
« Oït l’ avez, sur vus le jugent Franc.
« — Sire, dist Guenes, ço ad tut fait Rollanz ;
« Ne l’amerai à trestut mun vivant,
« Ne Oliver por ço qu’il est sis cumpainz,
325« Les duze Pers, pur ço qu’il l’aiment tant ;
« Desfi les en, Sire, vostre veiant. »
Ço dist li Reis : « Trop avez mal talant.
« Or irez vus certes quant jo l’cumant.
« — Jo i puis aler ; mais n’i averai guarant ;
330« Nul out Basilies ne sis freres Basanz. » Aoi.
Li Emperere li tent sun guant, le destre ;
Mais li quens Guenes iloec ne volsist estre ;
Quant le dut prendre, si li caït à tere.
Dient Franceis : « Deus ! que purrat ço estre ?
335« De cest message nus avendrat granz perte.
« — Seignurs, dist Guenes, vus en orrez noveles. Aoi.
« Sire, dist Guenes, dunez mei le cungied ;
« Quant aler dei, n’i ai plus que targer. »
Ço dist li Reis : « Al Jhesu e al men ! »
340De sa main destre l’ad asolt e seignet,
Puis li liverat le bastun et le bref. Aoi.
Guenes li quens s’en vait à sun ostel,
De guarnemenz se prent à cunreer,
De ses meillurs que il pout recuverer :
345Esperuns d’or ad en ses piez fermez,
Ceinte Murgleis s’espée à sun costet,
En Tachebrun sun destrer est muntez :
L’estreu li tint sis uncles Guinemers.
Là veïsez tanz chevalers plorer,
350Ki tuit li dient : « Tant mare fustes, ber !
« En la curt al Rei mult i avez estet,
« Noble vassal vus i solt hom clamer.
« Ki ço jugat que doüssez aler,
« Par Carlemagne n’ert guariz ne tensez.
355« Li quens Rollanz ne l’ se doüst penser,
« Que estraiz estes de mult grant parentet. »
Enprès li dient : « Sire, car nos menez. »
Ço respunt Guenes : « Ne placet damne Deu !
« Melz est que suls moerge que tant bon chevaler.
360« En dulce France, seignurs, vus en irez,
« De meie part ma muiller saluez,
« E Pinabel mun ami e mun per,
« E Baldewin mun fil que vus savez,
« E lui aidez, e pur seignur le tenez. »
365Entret en sa veie, si s’est acheminet… Aoi.
L’AMBASSADE ET LE CRIME DE GANELON
Guenes chevalchet suz une olive halte :
Asemblet s’est as sarrasins messages ;
Mais Blancandrins, ki envers lui s’atarget,
Par grant saveir parolet li uns al altre.
370Dist Blancandrins : « Merveillus hom est Carles,
« Ki cunquist Puille e trestute Calabre,
« Vers Engletere passat il la mer salse,
« Ad oes seint Pere en cunquist le chevage.
« Que nus requert ça en la nostre Marche ? »
375Guenes respunt : « Itels est sis curages :
« Jamais n’ert hom ki encuntre lui vaille. » Aoi.
Dist Blancandrins : « Franc sunt mult gentil hume :
« Mult grant mal funt e cil duc e cil cunte
« A lur seignur, ki tel cunseill li dunent ;
380« Lui e altrui travaillent e cunfundent. »
Guenes respunt : « Jo ne sai veir nul hume
« Ne mais Rollant ki uncore en averat hunte...
« Er main sedeit li Emperere suz l’umbre ;
« Vint i ses niés, out vestue sa brunie,
385« E out preiet dejuste Carcasunie.
« En sa main tint une vermeille pume :
« Tenez, bel sire, dist Rollanz à sun uncle,
« De trestuz reis vus present les curunes. »
« Li soens orguilz le devereit ben cunfundre,
390« Kar cascun jur à mort il s’abandunet :
« Seit ki l’ ociet, tute pais puis averiumes. » Aoi.
Dist Blancandrins : « Mult est pesmes Rollanz,
« Ki tute gent voelt faire recreant
« E tutes teres met en chalengement.
395« Par quele gent quiet il espleiter tant ? »
Guenes respunt : « Par la franceise gent ;
« Il l’aiment tant ne li faldrunt nient.
« Or e argent lur met tant en present,
« Muls e destrers, e palies e guarnemenz !
400« Li Reis méismes ad tut à sun talent.
« Cunquerrat li les teres d’ici qu’en Orient. » Aoi.
Tant chevalcherent Guenes e Blancandrins
Que l’uns à l’altre la sue feit plevit
Que il querreient que Rollanz fust ocis
405Tant chevalcherent e veies e chemins
Qu’en Sarraguce descendent suz un if.
Un faldestoed out suz l’umbre d’un pin,
Envolupet fut d’un palie alexandrin :
Là fut li Reis ki tute Espaigne tint ;
410Tut entur lui vint milie Sarrazin ;
N’i ad celui ki mot sunt ne mot tint
Pur les nuveles qu’il vuldreient oïr.
Atant as vus Guenes e Blancandrins. Aoi.
Blancandrins vint devant l’Empereür,
415Par le puign tint le cunte Guenelun,
E dist al Rei : « Salvez seiez de Mahum
« E d’Apollin, dunt seintes leis tenum !
« Vostre message fesimes à Carlun :
« Ambes ses mains en levat cuntremunt,
420« Loat sun Deu, ne fist altre respuns.
« Ci vus enveiet un soen noble barun,
« Ki est de France, si est mult riches hum ;
« Par lui orrez se averez pais u nun. »
Respunt Marsilies : « Or diet, nus l’orrum. » Aoi.
425Mais li quens Guenes se fut ben purpenset :
Par grant saveir cumencet à parler
Cume celui ki ben faire le set,
E dist al Rei : « Salvez seiez de Deu,
« Le Glorius, que devum aürer !
430« Iço vus mandet Carlemagnes li bers :
« Que recevez sainte chrestientet :
« Demi Espaigne vus voelt en fieu duner.
« Se ceste acorde ne vulez otrier,
« Pris e liez serez par poestet ;
435« Al siège ad Ais en serez amenez,
« Par jugement serez iloec finez :
« Là murrez vus à hunte e à viltet. »
Li reis Marsilies en fut mult esfreez :
Un algeir tint ki d’or fut enpenez,
440Ferir l’en voelt, se n’en fust desturnez. Aoi.
Li reis Marsilies ad la culur muée,
De sun algeir ad la hanste crollée.
Quant le vit Guenes, mist la main à l’espée,
Cuntre dous deiz l’ad de l’ furrer getée ;
445Si li ad dit : « Mult estes bele e clere ;
« Tant vus averai en curt à rei portée,
« Ja ne l’ dirat de France li emperere
« Que suls moerge en l’estrange cuntrée,
« Einz vus averunt li meillur cumparée. »
450Dient païen : « Desfaimes la meslée. » Aoi.
Tant li preièrent li meillur Sarrazin
Qu’el faldestoed s’est Marsilies asis.
Dist l’Algalifes : « Mal nus avez bailliz.
« Que le Franceis asmastes à ferir ;
455« Vus le doüssez esculter e oïr.
« — Sire, dist Guenes, me l’ cuvent à suffrir.
« Jo ne lerreie, por tut l’or que Deus fist,
« Por tut l’aveir ki seit en cest païs,
« Que jo ne li die, se tant ai de leisir,
460« Que Carlemagnes, li Reis poëstéifs,
« Par mei li mandet sun mortel enemi. »
Afublez est d’un mantel sabelin,
Ki fut cuvert d’un palie alexandrin :
Getet le à tere, si l’ receit Blancandrins ;
465Mais de s’espée ne voelt mie guerpir,
En sun puign destre par l’oret punt la tint.
Dient païen : « Noble barun ad ci ! » Aoi.
Envers le Rei s’est Guenes aproismez,
Si li ad dit : « A tort vus curuciez ;
470« Kar ço vus mandet Carles ki France tient,
« Que recevez la lei de chrestiens ;
« Demi Espaigne vus durrat il en fiet,
« E sun nevuld Rollant l’altre meitet :
« Mult orguillos parçuner i averez.
475« Se ceste acorde ne vulez otrier,
« En Sarraguce vus vendrat aseger ;
« Par poestet serez pris e liez,
« Menez serez tut dreit à Ais le siet ;
« Vus n’i averez palefreid ne destrer
480« Ne mul ne mule que puissiez chevalcher.
« Getez serez sur un malvais sumer ;
« Par jugement iloec perdrez le chef.
« Nostre emperere vus enveiet cest bref. »
El destre poign al païen l’ad liveret. Aoi.
485Marsilies fut esculurez de l’ ire,
Freint le scel, getet en ad la cire,
Guardet al bref, vit la raisun escrite :
« Carles me mandet, ki France ad en baillie,
« Que me remembre de la dulur e de l’ ire ;
490« Ço est de Basan e de sun frere Basilie,
« Dunt pris les chefs as puis de Haltoïe.
« Se de mun cors voeill aquiter la vie,
« Dunc li enveie mun uncle, l’Algalife,
« Kar altrement ne m’amerat il mie. »
495Après parlat sis filz envers Marsilie,
E dist al Rei : « Guenes ad dit folie.
« Tant ad erret nen est dreit que plus vivet ;
« Liverez le mei, jo en ferai la justise. »
Quant l’oït Guenes, l’espée en ad branlie,
500Vait s’apuier suz le pin à la tige... Aoi.
Enz el verger s’en est alez li Reis,
Ses meillurs humes enmeinet ensembl’ od sei ;
E Blancandrins i vint al canut peil,
E Jurfalez ki est sis filz e sis heirs,
505E l’Algalifes sis uncles e sis fedeilz.
Dist Blancandrins : « Apelez le Franceis,
« De nostre prod m’ad plevie sa feid. »
Ço dist li Reis : « E vus, l’i ameneiz. »
E Guene ad pris par la main destre as deiz,
510Enz el verger l’enmeinet jusqu’al Rei.
Là purparolent la traïsun seinz dreit. Aoi.
« Bel sire Guene, ço li ad dit Marsilies,
« Jo vus ai fait alques de legerie,
« Quant pur ferir vus demustrai grant ire.
515« Faz vos en dreit par cez pels sabelines :
« Melz en valt l’or que ne funt cinc cenz livres.
« Einz demain noit en ert bele l’amendise. »
Guenes respunt : « Jo ne l’ desotrei mie.
« Deus, se lui plaist, à ben le vus mercie ! » Aoi.
520Ço dist Marsilies : « Guene, par veir sacez,
« En talent ai que mult vus voeill amer.
« De Carlemagne vus voeill oïr parler :
« Il est mult velz, si ad sun tens uset,
« Men escient, dous cenz anz ad passez,
525« Par tantes teres ad sun cors demenet !
« Tanz colps ad pris sur sun escut bucler !
« Tanz riches reis cunduiz à mendistet !
« Quant ert il mais recreanz d’osteier ? »
Guenes respunt : « Carles n’est mie tels.
530« N’est hom ki l’ veit e conuistre le set,
« Que ço ne diet que l’Emperere est bers.
« Tant ne l’ vus sai ne preiser ne loer
« Que plus n’i ad d’honur e de bontet.
« Sa grant valur ki l’ purreit acunter ?
535« De tel barnage l’ad Deus enluminet !
« Melz voeill murir que guerpir sun barnet. » Aoi.
Dist li païens : « Mult me puis merveiller
« De Carlemagne ki est canuz e velz,
« Men escientre, dous cenz anz ad e melz.
540« Par tantes teres ad sun cors traveillet !
« Tanz colps ad pris de lances e d’espiez !
« Tanz riches reis cunduiz à mendistet !
« Quant ert il mais recreanz d’osteier ?
« — Ço n’ert, dist Guenes, tant cum vivet sis niés :
545« N’ad tel vassal suz la cape del cel ;
« Mult par est proz sis cumpainz Olivers ;
« Li .xii. Per, que Carles ad tant chers,
« Funt les enguardes à .xx. milie chevalers.
« Soürs est Carles, que nul home ne crent. » Aoi.
550Dist li Sarrazins : « Merveille en ai grant
« De Carlemagne ki est canuz e blancs :
« Men escientre, plus ad de .ii. c. anz.
« Par tantes teres est alez cunqueranz !
« Tanz colps ad pris de bons espiez trenchanz !
555« Tanz riches reis morz e vencuz en champ !
« Quant ert il mais d’osteier recreanz ?
« — Ço n’ert, dist Guenes, tant cum vivet Rollanz :
« N’ad tel vassal d’ici qu’en Orient ;
« Mult par est proz Olivers sis cumpainz ;
560« Li .xii. Per, que Carles aimet tant,
« Funt les enguardes à .xx. milie de Francs.
« Soürs est Carles, ne crent hume vivant. » Aoi.
« — Bel sire Guene, dist Marsilies li Reis,
« Jo ai tel gent, plus bele ne verreiz ;
565« Quatre cenz milie chevalers puis aveir :
« Puis m’en cumbatre à Carle et à Franceis. »
Guenes respunt : « Ne vus à ceste feiz !
« De voz païens mult grant perte i avereiz.
« Lessez la folie, tenez vus al saveir ;
570« L’Emperéur tant li dunez aveir,
« N’i ait Franceis ki tut ne s’en merveilt.
« Pur .xx. ostages, que li enveiereiz,
« En dulce France s’en repairerat li Reis ;
« Sa rere-guarde lerrat derere sei,
575« Ert i sis niés, li quens Rollanz, ço crei,
« E Olivers, li proz e li curteis ;
« Mort sunt li cunte, se est ki mei en creit.
« Carles verrat sun grant orguill cadeir,
« N’averat talent que jamais vus guerreit. » Aoi.
580« — Bel sire Guene, ço dist li reis Marsilies,
« Cum faitement purrai Rollant ocire ? »
Guenes respunt : « Ço vus sai jo ben dire :
« Li Reis serat as meillurs porz de Sizer,
« Sa rere-guarde averat detrès sei mise ;
585« Ert i sis niés li quens Rollanz, li riches,
« E Olivers en ki il tant se fiet ;
« .Xx. milie Francs unt en lur cumpaignie.
« De voz païens lur enveiez .c. milie ;
« Une bataille lur i rendent cil primes :
590« La gent de France ert blecée e blesmie ;
« Ne l’ di pur ço des voz ert là martirie.
« Altre bataille lur liverez de meïsme.
« De quel que seit Rollanz n’estoertrat mie.
« Dunc averez faite gente chevalerie,
595« N’averez mais guere en tute vostre vie. Aoi.
« Ki purreit faire que Rollanz i fust morz,
« Dunc perdreit Carles le destre braz de l’ cors ;
« Si remeindreient les merveilluses oz,
« N’asemblereit Carles si grant esforz,
600« Tere Majur remeindreit en repos. »
Quant l’ot Marsilies, si l’ ad baiset el col ;
Puis si cumencet à uvrir ses tresors. Aoi.
Ço dist Marsilies : — qu’en parlereient il plus ?
« — Cunseill n’est proz dunt hume n’est soürs :
605« La traïsun me jurrez de Rollant, se il i est. »
Ço respunt Guenes : « Issi seit cum vus plaist. »
Sur les reliques de s’espée Murgleis
La traïsun jurat ; s’en est forsfait. Aoi.
Un faldestoed i out d’un olifant.
610Marsilies fait porter un livre avant :
La leis i fut Mahum e Tervagan.
Ço ad juret li Sarrasins Espans :
« Se en rere-guarde truvet le cors Rollant,
Cumbatrat sei à trestute sa gent,
615E, se il poet, murrat i veirement. »
Guenes respunt : « Ben seit vostre cumanz ! » Aoi.
Atant i vint uns païens, Valdabruns,
Icil levat le rei Marsiliun ;
Cler, en riant, l’ad dit à Guenelun :
620« Tenez m’espée, meillur n’en ad nuls hum,
« Entre les helz ad plus de mil manguns :
« Par amistet, bel sire, la vus duins,
« Que nus aidez de Rollant le barun,
« Qu’en rere-guarde truver le poüssum.
625« — Ben serat fait, » li quens Guenes respunt ;
Puis se baiserent es vis e es mentuns. Aoi.
Après i vint uns païens, Climorins,
Cler, en riant, à Guenelun l’ad dit :
« Tenez mun helme, unkes meillur ne vi ;
630« Si nus aidez de Rollant le marchis,
« Par quel mesure le poüssum hunir.
« — Ben serat fait, » Guenes li respundit ;
Puis se baiserent es buches e es vis. Aoi.
Atant i vint la reine Bramimunde :
635« Jo vus aim mult, sire, dist ele al Cunte,
« Car mult vus priset mis sire e tuit si hume.
« A vostre femme enveierai dous nusches :
« Ben i ad or, matices e jacunces,
« E valent melz que tut l’aveir de Rume ;
640« Vostre emperere si bones n’en out unkes. »
Il les ad prises, en sa hoese les butet. Aoi.
Li Reis apelet Malduit sun tresorer :
« L’aveir Carlun est il apareillet ? »
E cil respunt : « Oïl, Sire, asez ben :
645« .Vii. c. cameil d’or e argent carget,
« E .xx. ostage des plus gentilz de suz cel. » Aoi.
Marsilies tint Guenelun par l’espalle,
Si li ad dit : « Mult par es bers e sages.
« Par cele lei que vus tenez plus salve,
650« Guardez de nus ne turnez le curage.
« De mun aveir vus voeill duner grant masse,
« .X. muls cargez del plus fin or d’Arabe ;
« Jamais n’ert anz altretel ne vus face.
« Tenez les clefs de ceste citet large,
655« Le grant aveir en presentez à Carle :
« Puis me jugez Rollant à rere-guarde.
« Se l’ puis truver à port ne à passage,
« Liverrai lui une mortel bataille. »
Guenes respunt : « Mei est vis que trop targe. »
660Puis est muntez, entret en sun veiage... Aoi.
Li Emperere aproismet sun repaire ;
Venuz en est à la citet de Galne,
Li quens Rollanz il l’ad e prise e fraite.
Puis icel jur en fut cent anz deserte.
665De Guenelun atent li Reis nuveles
E le tréut d’Espaigne la grant tere.
Par main en l’albe, si cum li jurz esclairet,
Guenes li quens est venuz as herberges. Aoi.
Li Emperere est par matin levez ;
670Messe e matines ad li Reis escultet.
Sur l’erbe verte estut devant sun tref.
Rollanz i fut e Olivers li bers,
Neimes li dux e des altres asez.
Guenes i vint, li fels, li parjurez.
675Par grant veisdie cumencet à parler,
E dist al Rei : « Salvez seiez de Deu !
« De Sarraguce ci vus aport les clefs ;
« Mult grant aveir vus en faz amener
« E .xx. ostages : faites les ben guarder.
680« E si vus mandet reis Marsilies li bers,
« De l’Algalife ne l’ devez pas blasmer ;
« Kar à mes oilz vi .iii. c. milie armez,
« Osbercs vestuz, alquanz helmes fermez,
« Ceintes espées as punz d’or neielez,
685« Ki l’en cunduistrent entresque en la mer.
« De Marsilie s’en fuient pur la chrestientet
« Que il ne voelent ne tenir ne guarder.
« Einz qu’il oüssent .iiii. liues siglet,
« Si’s aquillit e tempeste e orez ;
690« Là sunt neiez, jamais ne’s reverrez.
« Se il fust vifs, jo l’ oüsse amenet.
« Del rei païen, Sire, par veir creez,
« Ja ne verrez cest premer meis passet
« Qu’il vus siurat en France le regnet,
695« Si receverat la lei que vus tenez.
« Jointes ses mains, ert vostre cumandez :
« De vus tendrat Espaigne le regnet. »
Ço dist li Reis : « Graciez en seit Deus !
« Ben l’avez fait, mult grant prod i averez. »
700Par mi cel ost funt mil grailles suner.
Franc desherbergent, funt lur sumers trusser ;
Vers dulce France tuit sunt acheminet. Aoi.
L’ARRIÈRE-GARDE ; ROLAND CONDAMNÉ À MORT
Carles li magnes ad Espaigne guastée,
Les castels pris, les citez violées.
705Ço dit li Reis que sa guere out finée.
Vers dulce France chevalchet l’Emperere.
Li quens Rollanz ad l’enseigne fermée,
En sum un tertre cuntre le ciel levée.
Franc se herbergent par tute la cuntrée.
710Païen chevalchent par cez greignurs valées,
Osbercs vestuz, brunies endossées,
Helmes lacez e ceintes lur espées,
Escuz as cols e lances adubées :
En un bruill par sum les puis remestrent,
715.Iiii. c. milie atendent l’ajurnée.
Deus ! quel dulur que li Franceis ne l’ sevent ! Aoi.
Tresvait li jurz, la noiz est aserie.
Carles se dort, li emperere riches ;
Sunjat qu’il ert as greignurs porz de Sizer :
720Entre ses puigns teneit sa hanste fraisnine ;
Guenes li quens l’ad de sur lui saisie ;
Par tel aïr l’ad estrussée e brandie,
Qu’envers le cel en volent les esclices.
Carles se dort, qu’il ne s’esveillet mie. Aoi.
725Après iceste, altre avisiun sunjat :
Qu’il en France ert à sa capele ad Ais ;
El destre braz li morst uns urs si mals ;
Devers Ardene vit venir un leupart :
Sun cors demeine mult fierement asalt.
730D’enz de la sale uns veltres avalat,
Que vint à Carle le galop e les salz,
La destre oreille al premer urs trenchat,
Iréement se cumbat al leupart.
Dient Franceis que grant bataille i ad,
735E il ne sevent li quels d’els la veintrat.
Carles se dort, mie ne s’esveillat. Aoi.
Tresvait la noiz, e apert la clere albe.
Li Emperere mult fierement chevalchet,
Par mi cel ost suvent e menu reguardet.
740« Seignurs baruns, dist li emperere Carles,
« Veez les porz e les destreiz passages :
« Kar me jugez k’ert en la rere-guarde. »
Guenes respunt : « Rollanz, cist mens fillastre ;
« N’avez barun de si grant vasselage. »
745Quant l’ot li Reis, fièrement le reguardet,
Si li ad dit : « Vus estes vifs diables ;
« El cors vus est entrée mortel rage.
« E ki serat devant mei en l’einz-guarde ? »
Guenes respunt : « Ogers de Denemarche.
750« N’avez barun ki melz de lui la facet. » Aoi.
Li quens Rollanz, quant il s’oït juger,
Dunc ad parlet à lei de chevaler :
« Sire parastre, mult vos dei aveir cher ;
« La rere-guarde avez sur mei juget ;
755« N’i perdrat Carles, li reis ki France tient,
« Men escientre, palefreid ne destrer,
« Ne mul ne mule que deiet chevalcher,
« Ne n’i perdrat ne runcin ne sumer,
« Que as espées ne seit einz esleget. »
760Guenes respunt : « Veir dites, jo l’ sai ben. » Aoi.
Quant ot Rollanz qu’ert en la rere-guarde,
Iréement parlat à sun parastre :
« Ahi ! culvert, malvais hom de put aire,
« Quias li guanz me caïst en la place,
765« Cume fist à tei li bastun devant Carle ! » Aoi.
« Dreit Emperere, dist Rollanz li barun,
« Dunez-mei l’ arc que vus tenez el puign ;
« Men escientre, ne l’ me reproverunt
« Que il me chedet cum fist à Guenelun
770« De sa main destre, quant reçut le bastun. »
Li Emperere en tint sun chef embrunc,
Si duist sa barbe e detoerst sun gernun,
Ne poet muer que de ses oilz ne plurt. Aoi.
Enprès iço, i est Neimes venuz :
775Meillur vassal n’out en la curt de lui,
E dist al Rei : « Ben l’avez entendut ;
« Li quens Rollanz il est mult irascuz :
« La rere-guarde est jugée sur lui ;
« N’avez barun ki jamais là remut.
780« Dunez li l’arc que vus avez tendut,
« Si li truvez ki très ben li aïut. »
Li Reis li dunet, e Rollanz l’a reçut. Aoi.
Li Emperere ad apelet Rollant :
« Bel sire niés, or savez veirement,
785« Demi mun ost vus lerrai en present ;
« Retenez les, ço est vostre salvement. »
Ço dit li quens : « Jo n’en ferai nient.
« Deus me cunfunde, se la geste en desment !
« .Xx. milie Francs retendrai ben vaillanz.
790« Passez les porz trestut soürement :
« Ja mar crendrez nul hume à mun vivant. » Aoi.
Li quens Rollanz est muntez el destrer.
Cuntre lui vient sis cumpainz Olivers ;
Vint i Gerins e li proz quens Gerers,
795E vint i Otes, si i vint Berengers,
E vint Sansun e Anséis li velz ;
Vint i Gerarz de Rossillon li fiers,
Venuz i est li Guascuinz Engelers.
Dist l’Arcevesques : « Jo irai par mun chef !
800« — E jo od vus, ço dist li quens Gualters,
« Hom sui Rollant, jo ne li dei faillir. »
Entre s’eslisent .xx. milie chevalers. Aoi.
Li quens Rollanz Gualter de l’ Hum apelet :
« Pernez mil Francs de France nostre tere,
805« Si purpernez les deserz e les tertres,
« Que l’Emperere nis un des soens n’i perdet. »
Respunt Gualters : « Pur vus le dei ben faire. »
Od mil Franceis de France la lur tere
Gualters desrenget les destreiz e les tertres.
810N’en descendrat pur malvaises nuveles,
Enceis qu’en seient .vii. c. espées traites.
Reis Almaris del regne de Belferne
Une bataille lur liverat le jur, pesme... Aoi.
Halt sunt li pui e li val tenebrus,
815Les roches bises, li destreit merveillus.
Le jur passerent Franceis à grant dulur :
De .xv. liues en ot hom la rimur.
Puis que il venent à la Tere Majur,
Virent Guascuigne la tere lur seignur.
820Dunc lur remembret des fieus e des honurs
E des pulceles e des gentilz oixurs :
Cel n’en i ad ki de pitet ne plurt.
Sur tuz les altres est Carles anguissus :
As porz d’Espaigne ad lesset sun nevuld.
825Pitez l’en prent, ne poet muer n’en plurt. Aoi.
Li .xii. Per sunt remés en Espaigne :
.Xx. milie Francs unt en la lur cumpaigne.
Nen unt poür ne de murir dutance.
Li Emperere s’en repairet en France ;
830Suz sun mantel enfuit la cuntenance.
Dejuste lui li dux Neimes chevalchet,
E dit al Rei : « De quei avez pesance ? »
Carles respunt : « Tort fait ki l’ me demandet.
« Si grant doel ai ne puis muer ne l’ pleigne.
835« Par Guenelun serat destruite France :
« Enoit m’avint une avisiun d’angele,
« Qu’ entre mes puinz me depeceit ma hanste,
« Ki mun nevuld jugat à rere-guarde.
« Jo l’ai lesset en une estrange marche.
840« Deus ! se jo l’pert, ja n’en averai escange. » Aoi.
Carles li magnes ne poet muer n’en plurt :
.C. milie Franc pur lui unt grant tendrur,
E de Rollant merveilluse poür.
Guenes li fels en ad fait traïsun ;
845Del rei païen en ad oüt granz duns,
Or e argent, palies e ciclatuns,
Muls e chevals, e cameilz e leuns.
Marsilies mandet d’Espaigne les baruns,
Cuntes, vezcuntes e dux e almacurs,
850Les amirafles e les filz as cunturs ;
.Iiii. c. milie en ajustet en .iii. jurz.
En Sarraguce fait suner ses taburs.
Mahumet levent en la plus halte tur ;
N’i ad païen ne l’ prit e ne l’ aürt.
855Puis, si chevalchent par mult grant cuntençun
Tere Certeine e les vals et les munz ;
De cels de France virent les gunfanuns,
La rere-guarde des .xii. Cumpaignuns :
Ne lesserat bataille ne lur duint. Aoi.
860Li niés Marsilie il est venuz avant
Sur un mulet, od un bastun tuchanz.
Dist à sun uncle belement en riant :
« Bel sire reis, jo vus ai servit tant,
« Si’n ai oüt e peines e ahans,
865« Faites batailles e vencues en champ ;
« Dunez m’ un fieu : ço est li colps de Rollant.
« Jo l’ ocirai à mun espiet trenchant,
« Se Mahumet me voelt estre guaranz ;
« De tute Espaigne aquiterai les pans,
870« Des porz d’Espaigne entresqu’à Durestant.
« Lasserat Carles, si recrerrunt si Franc ;
« Ja n’averez guere en tut vostre vivant. »
Li reis Marsilies l’en ad dunet le guant. Aoi.
Li niés Marsilie tient le guant en sun puign ;
875Sun uncle apelet de mult fière raisun :
« Bel sire reis, fait m’avez un grant dun.
« Eslisez mei .xi. de voz baruns,
« Si m’ cumbatrai as .xii. Cumpaignuns. »
Tut premereins l’en respunt Falsarun :
880— Icil ert frere al rei Marsiliun —
« Bel sire niés, e jo e vus irum,
« Ceste bataille veirement la ferum ;
« La rere-guarde de la grant ost Carlun,
« Il est juget que nus les ocirum. » Aoi.
885Reis Corsablis il est de l’ altre part :
Barbarins est e mult de males arz.
Cil ad parlet à lei de bon vassal,
Pur tut l’or Deu ne voelt estre cuarz...
As vus poignant Malprimis de Brigal :
890Plus curt à piet que ne fait uns chevals,
Devant Marsilie cil s’escriet mult halt :
« Jo conduirai mun cors en Rencesvals ;
« Se truis Rollant, ne lerrai que ne l’ mat. » Aoi.
Un amurafle i ad de Balaguet ;
895Cors ad mult gent e le vis fier e cler ;
Puis que il est sur sun cheval muntez,
Mult se fait fier de ses armes porter ;
De vasselage il est ben alosez ;
Fust chrestiens, asez oüst barnet.
900Devant Marsilie cil s’ en est escriet :
« En Rencesvals irai mun cors guier ;
« Se truis Rollant, de mort serat finez ;
« E Olivers e tuit li .xii. Per ;
« Franceis murrunt à doel e à viltet.
905« Carles li magnes velz est e redotez :
« Recreanz ert de sa guerre mener :
« Si nus remeindrat Espaigne en quitedet. »
Li reis Marsilies mult l’en ad merciet. Aoi.
Un almacur i ad de Moriane :
910N’ad plus felun en la tere d’Espaigne.
Devant Marsilie ad faite sa vantance :
« En Rencesvals guierai ma cumpaigne,
« .Xx. milie humes ad escuz e à lances.
« Se truis Rollant, de mort li duins fiance ;
915« Jamais n’ert jurz que Carles ne se pleignet. » Aoi.
D’altre part est Turgis de Turteluse ;
Cil est uns quens, si est la citez sue ;
De chrestiens voelt faire male vode.
Devant Marsilie as altres si s’ajustet,
920Ço dist al Rei : « Ne vos esmaiez unkes.
« Plus valt Mahum que seint Pere de Rume ;
« Se lui servez, l’honur del camp ert nostre.
« En Rencesvals à Rollant irai juindre,
« De mort n’averat guarantisun pur hume.
925« Veez m’espée ki est e bone e lunge,
« A Durendal jo la metrai encuntre,
« Asez orrez la quele irat desure.
« Franceis murrunt, se à nus s’abandunent ;
« Carles li velz averat e doel e hunte,
930« Jamais en tere ne porterat curune. » Aoi.
D’altre part est Escremiz de Valterne ;
Sarrasins est, si est sue la tere.
Devant Marsilie s’escriet en la presse :
« En Rencesvals irai l’orguill desfaire ;
935« Se truis Rollant, n’enporterat la teste,
« Ne Olivers ki les altres cadelet :
« Li .xii. Per tuit sunt juget à perdre ;
« Franceis murrunt, e France en ert deserte.
« De bons vassals averat Carles suffraite. » Aoi.
940D’altre part est uns païens, Esturganz ;
Estramariz i est, uns soens cumpainz ;
Cil sunt felun traïtur suduiant.
Ço dist Marsilies : « Seignurs, venez avant.
« En Rencesvals irez as porz passant,
945« Si aiderez à cunduire ma gent. »
E cil respundent : « Sire, à vostre cumant.
« Nus asaldrum Oliver e Rollant,
« Li .xii. Per n’averunt de mort guarant ;
« Car noz espées sunt bones e trenchant :
950« Nus les ferum vermeilles de chald sanc.
« Franceis murrunt, Carles en ert dolenz.
« Tere Majur vus metrum en present ;
« Venez i, Reis, si l’ verrez veirement :
« L’Empereür vus metrum en present. » Aoi.
955Curanz i vint Margariz de Sibilie,
Cil tient la tere entresqu’à Scaz marine.
Pur sa beltet dames li sunt amies ;
Cele ne l’ veit vers lui ne s’esclargisset ;
Quant ele le veit, ne poet muer ne riet.
960N’i ad païen de tel chevalerie.
Vint en la presse, sur les altres s’escriet,
E dist al Rei : « Ne vus esmaiez mie,
« En Rencesvals irai Rollant ocire,
« Ne Olivers n’enporterat la vie ;
965« Li .xii. Per sunt remés en martirie.
« Veez m’espée ki d’or est enheldie :
« Si la tramist li amiralz de Primes ;
« Jo vus plevis qu’en vermeill sanc ert mise.
« Franceis murrunt e France en ert hunie.
970« Carles li velz à la barbe flurie,
« Jamais n’ert jurz qu’il n’en ait doel e ire.
« Jusqu’à un an averum France saisie,
« Gesir purrum el burc de Seint-Denise. »
Li reis païens parfundement l’enclinet. Aoi.
975D’altre part est Chernubles de Munigre.
Jusqu’à la tere si chevel li balient ;
Greignur fais portet par giu, quant il s’enveiset,
Que .iiii. mul ne funt, quant il sumeient.
Icele tere, ço dit, dunt il esteit,
980Soleilz n’i luist, ne blet n’i poet pas creistre,
Pluie n’i chet, rusée n’i adeiset,
Piere n’i ad que tute ne seit neire.
Dient alquant que diables i meignent.
Ço dist Chernubles : « Ma bone espée ai ceinte.
985« En Rencesvals jo la teindrai vermeille ;
« Se truis Rollant le proz en mi ma veie,
« Se ne l’ asaill, dunc ne faz jo que creire ;
« Si conquerrai Durendal od la meie.
« Franceis murrunt, e France en ert deserte. »
990A icez moz li .xii. Per saleient,
Itels .c. milie Sarrazins od els meinent,
Ki de bataille s’arguent e hasteient.
Vunt s’aduber desuz une sapeie. Aoi.
Païen s’adubent d’ osbercs sarazineis,
995Tuit li plusur en sunt dubiet en treis ;
Lacent lor helmes mult bons sarraguzeis,
Ceignent espées de l’ acer vianeis,
Escuz unt genz, espiez valentineis,
E gunfanuns blancs e blois e vermeilz.
1000Laissent les muls e tuz les palefreiz,
Es destrers muntent, si chevalchent estreiz.
Clers fut li jurz, e bels fut li soleilz,
N’unt guarnement que tut ne reflambeit.
Sunent mil grailles por ço que plus bel seit ;
1005Granz est la noise, si l’ oïrent Franceis.
Dist Olivers : « Sire cumpainz, ço crei,
« De Sarrazins purrum bataille aveir. »
Respunt Rollanz : « E Deus la nus otreit !
« Ben devum ci estre pur nostre rei ;
1010« Pur sun seignur deit hom suffrir destreiz,
« E endurer e granz chalz e granz freiz ;
« Si’n deit hom perdre e del quir e del peil.
« Or guart cascuns que granz colps i empleit,
« Que malvais chant de nus chantet ne seit.
1015« Païen unt tort, e chrestien unt dreit.
« Malvaise essample n’en serat ja de mei ! » Aoi.