Le Mespris de la vie et consolation contre la mort/« Meint penible tourment nous espreuve et nous tente »
Le Mespris de la vie et consolation contre la mort
CXIX.
Meint penible tourment nous espreuve et nous tente
Toutefois le plus grief est celuy de la mort,
Dont l'estrif violent est si promt & si fort
Que jusqu'au dernier point il nous presse & tourmente
Et comme fera donc la foible main tremblante
Du gendarme nouveau aus armes mal accort,
Qui jamais ne soustint le magnanime effort
Dont un brave guerrier l'ennemis violente ?
Par ainsi devons nous munir & preparer
Nos cuers à tel conflit, esquiver & parer
A ses cous hasardeus, puis nous aurons la gloire
D'avoir un fort vaincueur bravement soustenu,
Car combatre en camp clos un ennemis conneu,
Est un espoir certain de certaine victoire.