Le Roman du Renart - D. M. Méon — 1826/25
C’est la Bataille de Renart et d’Ysangrin.
Mesire Nobles li Lions
O soi avoit toz ses barons
A icel terme et à cel point,
Que li Leus fu en si mal point,
Que il ot la queue perdue.
Trois jors ot jà sa Cort tenue,
Bien l’ont li baron maintenue.
..............[1]
Et sachiez bien de verité
Que moult en i ot assemblé.
Venu i sont de mainte terre
Sanz ce qu’il les envoiast querre ;
Venu i erent tuit ensemble
Fors sire Renart, ce me semble.
Cil n’i voloit mie venir,
Ne la Cort le Roi meintenir,
Si avoit auques de raison
Qu’il le lessoit por l’acheson
Et por la peine et por la dote
De ce que ne l’amoient gote.
La gent le Roi n’iert mie coie,
Tuit meinent grant bruit et grant joie ;
Grant joie font par le palais
Et chantoient et sons et lais,
Et sonent tinbres et tabors.
Atant vint Ysengrin li cous,
Entre eus se tint tot en apert,
Son cul aporte descovert,
Qar ne l’avoit de coi covrir.
Et qant il le voient venir,
Si le conmencent à gaber :
Einssi ne devez pas aler,
Biau sire, covrez vostre tro ;
Estes-vos de l’Ordre Saint Po
Qui aportez si grant coronne ?
Ysengrin nul n’en aresonne,
Ançois passe outre et va tot droit
Là où Mesire Noble estoit.
Illec se met agenoillous,
Claime soi de Renart li rous
Par qui il est si atornez
Qu’il a toz les grenons plumez,
Et si a la queue perdue
Dont il a grant dolor éue,
Que trop en a fet male garde.
Mesire Noble ce regarde,
Si conmence à rire moult fort.
Ysengrin, fait-il, bien t’a mort
Cil qui ainsi t’a atorné,
Moult t’a malement coroné,
Ne t’est remès poil en la teste,
Miex sembles déables que beste.
Biau sire, ce m’a fet Renart
Par son engin et par son art,
Et encore m’a-il pis fet,
Mon esmochéor m’a toloit,
Dont m’a malement tempesté ;
Et qant je viendrai en esté,
Les moches me voudront mengier
Et je ne m’en porrai aidier,
Si en sui corouciez moult fort.
Dist Nobles, tu n’as mie tort,
Il t’en poise, s’en es irez,
Mès tu en seras bien vengiez,
Qar jel’ ferai venir à Cort,
Sel’ comparra ainz qu’il s’en tort.
Où estes-vos, sire Grimbert ?
Or s’est Renart trop descovert,
Or est trop apers ses baraz,
Alez le moi querre viaz.
Bien sai que tant est forsenez
Que se vos ne le m’amenez,
Nus autres nel’ porroit avoir ;
Alez, si li fetes savoir
Que je voil que il viengne à Cort.
Et grimbert devant li acort :
Sire, fet-il, vostre plaisir
C’est la riens que je plus desir ;
Moult volentiers vers li irai,
Se je le truis, si l’amerrai.
A itant de la Cort se part,
Va-s’en droit au chastel Renart
De cui la clamor est venue
A Noble et à sa gent menue,
Jà soit ce qu’il fust moult irez
D’Ysengrin qui est escouez,
Conmande qu’il se logent tuit.
Con cil qui est de grant déduit
Dancent et balent et querolent,
Taborent, dancent et citolent ;
O haute voiz, o longe aleine
De bien chanter chascun se peine :
L’uns à l’autre son chant avale,
Tentist le palès et la sale
Du chant et de la melodie
Que demainne la baronnie.
Qant il orent assez balé,
Assez tencié et ramposné,
Estes-vos Dant Grinbert le sage
Qui bien ot forni son mesage,
Qui avec lui Renart amaine :
Atret l’i a à moult grant paine.
Par tens, si conme nos cuidons,
Li ert rendus ses guerredons.
S’or ne set moult Renart de frape,
Il est chaoit en male trape :
Chascun sor lui ses denz acuse,
Ysengrin qui au Roi l’acuse,
Siet de joste les piez le Roi.
Se Renart fu en grant effroi
Nus hom ne s’en doit merveillier,
Qu’il est el desréain millier,
Qar Tiecelin moult se conseille,
Et la Mesenge s’apareille
Por lui rester de traïson ;
Et Chantecler qui de prison
Ert eschapez par sa favele.
Ysengrin son conseil apele
Et ses amis à une part.
Or est avenuz mal Renart,
Bien povez savoir et entendre
N’en ira mès sanz beste vendre.
Bruns li Ors et Tybert li Chaz
Ont amenez lor avocaz,
Dient qu’il le voudront grever,
Jà ne s’en porra eschiver ;
Volentiers s’en tornast arriere
S’il poïst en nule maniere ;
Mès à enviz ou volentiers
Sera à la Cort ses sentiers.
Tout droit à l’entrer de la porte
Vet reculant, moult le conforte
Grinbert et dist, n’aies poor,
De deux max prent-en le menor ;
Se tu t’en tornoies de ci,
Ce pués-tu bien savoir de fi,
Voilles ou non retorneras,
Vers le Roi ganchir ne porras.
Renart ne t’esmaier-tu mie,[2]
Nus ne set con longe est sa vie ;
Renart, soies de bel semblant,
Qar un jor vaut miex que un an.
Coart dote tot tens sa mort,
Cosin, soies de bon confort,
Fortune secort les hardiz[3]
Si conme conte li escriz.
Renart ot que cil le sarmone,
Et que moult bon conseil li done,
Prent cuer, si s’en entre el palès,
Grinbert avant, Renart après.
Renart ne sembla pas vilein,
Son cosin tenoit par la mein :
La presse desront et depart,
N’i a celui qui ne l’esgart.
Devant le Roi, con ainz le vit,
S’agenoilla et puis li dist :
Rois, Dex le filz Sainte Marie
Vos gart et vostre conpaignie,
Et avec tot vostre barné !
Et li Lyon l’a regardé
Par grant fierté, par grant orgueil.
Renart le connut bien à l’ueil ;
Moult par a grant péor de lui
Qu’il crient qu’il ne li face anui :
Miex vosist estre aillors toz nuz
Qu’en sa Cort fust encor venuz.
Li baron sont tuit à repos,
Par la sale n’i a tant os
Qui i face ne cri ne noise.
Li Rois parla, Renart s’aqoise,
Puis li a dit par felonie,
Ces saluz ne vos ren-je mie,
Rous venimeus de pute foi,
Einz remandrez anchois o moi :
Einz que issiez de cest estage
Nos lairez-vos céanz bon gage,
Au mains ceste rouse pelice.
Qant estoies dedenz ta lice,
Ne cuidoies mès reperier,
Tot le mont cuides gerroier :
Tant con torna bien ta roële
Nos as servi de la favele ;
Mès meintes foiz as oï dire
Qu’après grant joie vient grant ire,
Et après Noël vente bise.
Tant va pot à l’eve que brise ;
Or quit-je moult, sire Renart,
Qu’il est brisiez de vostre part.
Li Rois parle, Renart escote
Et a dit que sa gent l’ot tote,
Renart, fait-il, à ton viaire
Sembles bien beste deputaire ;
Bien pert à toi que fus li poz,
Plein es de venin conme boz :
Onques nul jor ne féis bien.
Renart, moult a en toi engien,
Por ce que tant m’as corocié
Et Ysengrin tant engingnié,
Et por ce que Tyberz li Chaz
Par ton engin fu pris au laz,
Et Bruns li Ors par mi le groing
El chesne dont ostas le coing ;
Et por Chantecler le baron
Que tu préis en traïson
Qant tu li féis les eulz clorre,
Et por ce que n’i vosis mordre
Dant Tiecelin, con tu fus lere,
Et la Mesenge ta conmere,
Par barat préis son fromage
Et de lui éus tel gage
Que tu lui ostas à tes canes
Quatre de ses plus beles panes ;
Tel guerredon t’en feré rendre
Que as forches t’en feré pendre.
Renart sot moult d’afetement,
Si respondi si faitement :
Biau sire, sauve vostre grace,
Onques ne fui de tel estrace
Qu’à mon seignor face contrere
Ne chose que ne doie fere :
Je sui vostre hom et vos mi sire,
De moi ne devez chose dire
Qui estre me puise à nuisance,
Mès bien estes de tel puissance
Qu’oster me poez de la terre,
Ne puis pas soffrir vostre guerre.
Moult par redot mes enemis,
Moult me poise se j’ai mespris
De rien qui à vos apartiegne ;
Mès non ai pas dont me soviegne.
Tiex vos ont fet le mal entendre
Et conté por moi entreprendre,
Qui ne le porroient prover :
Mençoigne poent-il trover,
Mès au voir dire sai-ge bien
Que ge n’i ai mespris de rien.
Jamès uns prodons n’ert amez,
Li plus loiax est plus blasmez :
Fox est qui mès dit verité,
Plusor en sont deserité[4]
Et de terre jetez à tort,
Li mentéor sont li plus fort.
Nus ne vos devroit tant deçoivre
Que ne déussiez aperçoivre
Qui mençonge vos fet acroire
Et qui vos conte chose voire :
Vint anz a que me connéustes,
Mès onques mès home n’éustes
Qui por vos ait tant paine éue,
Encor en ai la char rompue
Des granz travax, ce est la some,
Dont je por vos alé à Rome,
A Salerne et à Montpellier
Par la mecine apareillier
Qui bone estoit au mal saner
Qui forment vos fesoit grever :
Aidié vos ai à mon pooir.
Sire, dist Grinbert, il dit voir.
Par Dieu, mestier vos ai éu,
Si vos ai or trop decéu,
Vos qui dites qu’il a meffet,
Por riens nel’ vodroit avoir fet,
Moult est vilain qui ce retret.
Noble son corage refret,
Grinbert, fet-il, bien avez dit,
Jà de ce ne serez desdit :
Bien puet-estre qu’il m’a servi,
Mès malement le m’a meri.
C’est verté que mandai Renart,
Tieberz i fu de moie part
Qui bien li dist c’a Cort venist,
Que jà en desdaing nel’ tenist :
Renart qui set de fauve anesse
Et de mainte fause pramesse,
Respondi que bien le feroit
Et qu’à la Cort o lui iroit ;
Renart fist del aler semblant,
Tybert tint son cheval enblant :
Qant il furent à une vile,
Renart qui sot de mainte guile,
L’ostel à un Provoire sot
Qui de lui moult fort se gaitot ;
En sa meson n’ot nule entrée
Fors un buiot[5] qant est fremée,
Là ot tendu laz por li prendre.
Renart fist à Tybert entendre
Que par iluec soloit venir
Et as gelines avenir,
Et tant i a soriz et raz
Bien en puet en pestre cent chaz.
Tybert cuida que voir déist
Et que nul mal ne li quersist,
Touz estenduz dedenz se mist.
De grant folie s’entremist,
Car au partir se tint por fol,
Li laz li chaï sor le col ;
Il ne sot tant bouter ne trere
Que d’ilec se poïst retrere.
Cil qui s’estoient entremis
Du laz tendre où il fu préis,
Qant oent qu’il est en prison,
L’un prist un pel, l’autre un baston,
Et Renart se met à la voie
Qui n’a talent que l’en le voie.
Tybert batent et donent coux,
Li laz ropt où tenoit li foux :
Dès que Tybert se sent à terre,
Les grenons croule, les denz serre,
Si li avint bele aventure,
N’avint plus bele à criature,
Que li Prestres i ert venuz
Deschauz, sanz braies et toz nuz ;
Vint à Tybert, sel’ volt ferir.
Cil guenchi qui se volt garir ;
Li Prestres à la c..... prent
Si que il de riens ne mesprent :
Bien sache, et ce est la voire,
Le plus de la c..... au Provoire
Menja ainz qu’issist de l’ostel,
N’eschapa mès Tybert d’autel.
La Prestresse ert toute esbahie
De la c..... qui ert perie :
Lasse ! fet-ele, malostrue !
Ne serai mès chiere tenue ;
Mesire a perdue sa joie
Por quoi chiere tenue estoie :
Or n’aura-il mès de moi cure
Qant il a perdu s’anbléure ;
Or sai bien qu’il me gerpira
Qant il aidier ne se porra.
Moult sui ore triste et dolente,
A joie ai usé ma jovente ;
Il me donoit si biax mengiers
Et les bons dras plus volentiers.
Or sai bien faillir m’i estuet,
Grant chose jà fere l’estuet :
Or a perdu son hardement,
Li Chaz l’a servi malement.
En ce qu’il demainent lor duel,
Tybert s’en ist par un bouel ;
Renart s’en fu pieça partiz,
Ainsi fu li giex mal partiz.
De ceste chose a fait sa plainte
Tybert, des autres i a mainte.
Bruns se replaint qu’il le fist batre
El chesne où il le fist enbatre,
Que charpentiers orent overt
Et lessié tout à descovert ;
Dist li que miel avoit dedenz.
Il i cuida metre les denz,
Son groing i mist et enbati,
Renart les coins en abati ;
Onques des coins n’i lessa un,
Par mi le groing retint Dant Brun.
Or fu li las à grant dolor,
Tote ot perdue sa color ;
Renart ne fist fors que sourire
Qant il le vit en tel martire,
Et dist à Brun, mengiez assez
Tant que soiez touz saoulez :
Le miel est vostre, jel’ vos lez
Et je m’en vois à grant eslez ;
Moult fet o vos mauvès aler,
Jà ne m’en orrez mès parler.
J’ai non Renart, biau sire Brun,
Ci n’est pas li gaains conmun :
Vos volez tot avoir sanz faille,
Jà n’en feré vers vos bataille,
Ainz le vos clameré tot quite,
Je n’ai mestier de fere luite.
Qant ramposnes ot assez faites,
Et assez li ot loupes traites,
Tornez s’en est, ne volt plus dire,
Mès Dant Brun n’ot talent de rire :
Le groing estraint et sache et tire,
Nel’ puet avoir s’il nel’ descire,
N’estoit pas du tot à son chois.
Li forestier vienent au bois,
Quatorze estoient en la route.
Qant voient Brun, l’un l’autre boute ;
Ge voi un Ors, dist li premiers,
Or i parra, frans forestiers,
Que bien voi qu’aidier ne le puet,
Or le prenon, fere l’estuet.
Qant Bruns li Ors les ot venir.
A donc ne se pot plus tenir,
Ainz sache à lui de tel aïr
Que tot le cuir fet departir
D’entre son groing et de ses moes,
N’en remest point entor ses joes ;
Mès ançois qu’il s’en fust ostez
Moult li ont batus les costez
De maçues et de bastons.
Issuz s’en est à reculons,
Renart l’a tenu por musart.
Ariere main jeta hasart,
Fuiant s’en vet à longe alaine,
Mès moult ot ançois sofert paine,
Et Dant Renart qui n’ait confesse,
Ne fine d’errer ne ne cesse ;
Qant vint au trespas d’une rue,
Une grant ramposne li rue :
Biau sire Brun, é ! qar me dites
Se iestes moines ou ermites,
Et se messe chanter savez
Qant vos si grant corone avez :
Moult par avez vermeil le chief
Bien pert que fustes à meschief
Et que la force n’est pas vostre,
Le pis n’est pas illeques nostre.
Einsi servi Renart mon home,
Par les sains que l’en prie à Rome,
Que le bon droit lor en ferai,
Se prover le puis jel’ pandrai.
Lors refist Brichemer son plaint,
Et la Mesenge se complaint
Que qant ele le volt besier
Et à lui se volt apaier
Les denz jeta por le coubrer,
Einsi la cuida estrangler,
Là li orent ses eles oés,
Atant resailli en son crués ;
Moult par fesoit grant desverie
Qant vers lui pensoit felonie.
Mainte traïson li a faite,
Prendre la cuida en son aire,
Ele estoit en foi sa conmere
Et el le tenoit por compere ;
Mès ele dut sanz demorer
Le comperage comperer.
Li gieus ne fu pas vers lui biax,
Et Renart fist que desloiax.
Qui son poil voit ne le doit croire,
Par nature fet à mescroire.
Dame Pinte se r’est clamée,
Qui de meinte gent est amée,
De sa seror Dame Copée
Que Renart li a esclopée,
Et cinc mortes de ses serors
Dont ses cuers ert en grant dolors.
Grant mal a fet à meinte gent,
Jà ne por or ne por argent
Nel’ doit l’en lessier à jugier
Por ses felonies vengier.
Li Corbiax est à Cort venuz
Et dist que droiz li soit tenuz
De Renart qui prist son formage
Et puis li fist si grant utrage
Que o les denz le volt sesir,
Mès n’en fist mie son plesir,
Qu’il s’aperçut qu’il le volt prendre,
Si s’en torna, nel’ volt atendre.
Renart qui set de tantes frumes,
Li esracha quatre des plumes ;
Bien le cuida avoir sorpris
Par son enging et entrepris :
Il li disoit qu’il avoit plaie,
Mès de lui ot male manaie.
Ne vos porroie pas retrere
Les max, l’anui ne le contrere
Que Dant Renart a fet aillors
A Ysengrin et à plusors.
Li Rois parla conme senez
Et dit, Seignors, or m’escoutez.
Ysengrin s’est à moi clamez
De Renart qui tant est blasmez,
Qui sa fame li a maumise
Et à force desoz lui mise
Si vilment et en tel maniere
Com se ce fust sa chanberiere ;
Toz ses pensers i sont forniz,
Se droit n’en ai, toz sui honiz.
Il en fu à serement mis
Por ce que il l’avoit promis,
Par devant nostre Connestable ;
Du delivrer mès ce fu fable,
Qant dut aler au saintuaire
Foui s’en li rous deputaire.
Ge ne voil que ma gent me hace,
Droit me covient que je li face.
Dant Rooniax li viex mastins
Qui reset de plusors latins
Et qui moult a fier le corage,
Se r’est clamés qant el mesage
L’avoie tramis de ma part
Qu’il me féist venir Renart,
Dont li fist Renart si grant honte
Que je n’en sai tenir le conte.
Mès bien ai oï sa querele
De qoi Dant Rooniax l’apele,
Si dist que par sa traïson
Le fist retenir en prison.
Amuser le sot par parole,
Et li dist de la cooignole
Que uns vilains avoit tendue
Lez une voie deffendue,
Qu’iloc gisoit un saintuaire
Qui ert apelé Saint Ylaire,
Et bien entendre li a fet
Qu’iloc redrecent li contret.
Cil n’en sot pas l’autorité,
Pensa qu’il déist vérité ;
Ne se sout pas contre garder :
Renart que l’en devroit larder,
Tant li fist par engin acroire
Que cil tint sa parole à voire,
Qui tant sages estre soloit ;
Nus n’est si sages ne foloit.
Là li fist Renart le musage ;
En l’engin avoit un fromage
Que uns vilains mis i avoit,
Et Renart moult bien le savoit :
A l’abessier vit le formage
Qui li fist rendre le péage.
Rooniax ne fist pas que sage,
Sailli avant, prist le formage,
Ne volt lessier que il n’i morde,
Au resachier estraint la corde
Qui desor le col li dévale,
Paine et angoisse soufri male.
Cil se frandoille et se detorne,
Et Renart qui point ne séjorne
Et qui l’ot mené conme fol,
Le lessa pendre par le col.
Renart li ros, que maufeu larde !
Li dist que des vignes fust garde.
Bien fu li mastins decéuz,
Des gardes fu aparcéuz ;
O maçues et o tiniaus
Li ont bien auné ses buriaus ;
Iloc ont tant le las batu
Q’à la terre l’ont abatu :
Ne bret, ne crie, qu’il ne puet,
Simplement contenir l’estuet,
A grant paine en escapa vis,
Si con il dit, jel’ vos plevis.
Moult devroit-l’en Renart destruire,
Toz li mondes li devroit nuire
Qui si baillist la bone gent.
Jà n’en prendrai or ne argent
Que ne le destruie o nel’ pende,
Se il n’est tiex qu’il se deffende :
Honte m’a fet et vilenie,
Trop ai sofert sa renardie.
Qant il fu au concile oen
Devant la feste Saint Jehen,
De Brun l’Ors, de Tybert le Chat
Et de moi qui par son barat
Avoit Ysengrin escoupé,
Il li avoit tot pardonné,
Qant il prist la Croiz por aler
Conme pelerin outre mer,
Sitost con de nos departi
Dant Coart le Lievre assailli.
De son bordon qui est ferrez
Li a touz perciez les costez ;
Avec soi l’en voloit porter
Qant ça s’en vint à moi parler.
Por lui prendre corui après
Et mi baron tuit à eslès :
Il n’ot cure de nostre avel,
Ainz se feri en son chastel.
Ce fu verité, je l’asis,
Mès onques ne pot estre pris
Jusqu’à la nuit de rovoisons
Que bien sot que nos dormions ;
Lors fu de son chastel issuz,
A l’ost s’en vint les sauz menuz,
N’i ot celui ne fust liez
A arbre ou par queue ou par piez,
Dont il fist moult que fel encriemes
Dont il lia jus moi-méismes ;
Puis en ala vers la Roïne
Que véue ot gesir souvine ;
Maintenant sor le cors li monte,
Toz fu près de fere moi honte,
Qant Dame Noble s’escriot
Si durement que il n’i ot
Baron qui ne fust esveilliez,
De lui aidier apareilliez :
Vers Renart voloient descendre,
Mès à el les covint entendre,
Que por force ne por povoir
D’ilec ne se porent movoir.
Je méismes me fui levez,
Tant sachiai que je fui grevez,
A poi n’oi la queue rompue
Qui estoit forment estendue.
Aussi nos trestuit estion
Qant Dant Tardif li Limaçon
Sailli sus, s’à l’espée traite :
Si a la besoigne si faite
Que il nos a touz desliez :
Il n’avoit pas esté liez.
Qant Renart qui le mont conchie
A véu ce, si torne en fuie,
Et nos nos fumes mis après.
Si con il ert de son huis près,
Que il voloit dedenz entrer,
Tardif li vint à l’encontrer
Qui moult est proz à grant merveille,
Si l’ot si pris parmi l’oreille,
Que por sachier ne por tirer
Ne pot onques avant aler.
Il me fu maintenant rendu,
Si conmandai qu’il fust penduz.
As forches l’avoient mené
Qant je li oi tout pardonné
Par la requeste d’Ermeline
Qui moult est cortoise meschine ;
Et qant fu as forches menez
Ne fist-il bien que forsenez :
Pelé le Rat illuec murtri,
Onques nul ame nel senti.
Puis s’en foui une valée,
Ma gent ert toute après alée.
Qant vit que ne pot eschaper
Sor un chesne prist à monter ;
Deus coingnies fis aporter,
Conmandai le chesne à couper.
Lors s’apensa qu’il porroit fere,
En ne fu-il bien deputaire !
Un petit vers terre s’aproche,
En sa main tint une grant coche,
Tel me donna delez l’oreille
La teste en oi toute vermeille ;
A terre me covint venir,
Onc ne me soi si bien tenir.
Qant mi baron l’orent véu
Tuit sont à moi acoréu,
N’entendent pas à lui gaitier,
Et Renart s’est mis au frapier.
Et lors fis-ge mon ban crier,
Par tout plevir et afier
Que quiconques le porroit prendre,
Tot maintenant le féist pendre.
Tout ce véistes et séustes,
Sire Grimbert, que vos i fustes :
Ainz puis ne pot estre tenuz,
Mès or est-il à Cort venuz ;
Traïnez ert ainz qu’il s’en tort
Par le jugement de ma Cort.
Renart, tot ce avez-vos fait,
Qui biau ce est, mal dehet ait !
Tot jors nos avez fet moleste,
De vos se plaint chascune beste ;
Mès par ma barbe, se je puis
Et je en mon conseil le truis,
Qant vos de moi departirez,
Jamès beste n’atraperez.
La moie foi en voil jurer
Que tot ce verroiz averer,
Car à ce estes-vos venuz
Que droiz en iert à Cort tenuz :
Renart, fait-il, trop es haïs.
Cil qui n’estoit pas esbahis
Ne trop hastiz en sa parole,
Esté avoit à bone escole :
Vers terre tint enclin le chief,
Et fet semblant qu’il li soit grief.
Bien se sot taire et bien parler,
Bien respondre et bien oposer
Qant il en a et leu et aise :
Or li covient que il se taise,
Car il voit le Roi corocié.
Un poi a son chief redrecié,
Il n’ot en lui rien que aprendre,
Bien se sot garder et deffendre,
Au Roi a dit qu’il li otroit
Qu’il puisse respondre et à droit,
Et au droit que dira sa Cort :
Tant en dirai n’en aurai tort.
Renart, fet Nobles, bien as dit
Jà en ce n’en auras desdit ;
Or di et nos escouteron,
Se tu dis bien nos nos tairon.
Renart respont, sire, bien dites
Qui avez dit ne sui pas quites
Des semonces que m’avez faites,
Que vos avez desor moi traites.
De Tybert et de la Mesenge
M’escondi bien conment qu’il prenge ;
De Chantecler et de Copée,
Que par moi ne fu esclopée,
N’a Chantecler ne fis otrage,
N’a Tiecelin de son formage.
Bruns li Ors s’est de moi clamez,
Certes à tort en sui blasmez :
Onc ne perdi par moi sa pel,
Ne ne fis mal à Roonel
Ne à mon conpere Ysengrin,
A tort m’encusent mi voisin.
Las ! mal servise ai toz jors fet,
Por bien fere à l’en le col fret ?
Chascun le set, n’i a si fort
Que tex ne peche qui encort.
Male grace m’a Diex donée,
Mès tex en est ma destinée
Que jà si bien ne saurai fere
Que il ne m’en viengne contrere.
Cestes moult ai à ces bien fet
Qui or m’ont porchacié cest plet :
Vos m’en avez hui fet semondre
Et je sui toz prest de respondre
Au jugement de vostre Cort.
A cest mot Ysengrin acort
Devant le Roi entre les autres,
Et Roonax li fel, li viautres,
La Mesenge et Tybert li Chaz,
Et Brun qui est de grant porchaz ;
Dame Rosete la jeline
Et Dame Pinte sa cousine
Qui soloit pondre les oés gros,
Et sire Chantecler li cos.
Tuit font devant le Roi lor plainte,
N’i a mestier parole fainte.
Renart se saigne à main esclenge,
Bien voit que ci n’a mestier guenche,[6]
Que li covient que raison rende,
Grant péor a qu’en ne le pende.
S’or ne set Renart de barat,
Mar a connu Tybert li Chat ;
S’or n’est chaüz en mal liens
Moult sera bons rectoriciens,
Se il sanz perte s’en eschape,
Sanz taillier chaperon ou chape :
De totes parz s’ot acuser
Q’à poines s’en set escuser.
Ce dist Nobles, que vos est vis ?
Renart respont, je vos plevis,
Si que bien connois par raison
Vers vos n’oi nule mesprison.
Sire, sire, ce dist Renart,
Jà Diex n’en ait en m’ame part,
Se je de meffet me recort
Dont envers vos éusse tort.
Il diront que que il voudront,
Jà por ce rien ne me toudront,
Se vos plest qui mes sires estes.
Moult sui sordiz de plusors bestes,
A tel ai porté grant honor
Qui puis m’a fet grant desonor.
Je sai que li tors n’est pas miens,
Totes voies vaincra li biens ;
Onques de riens ne m’entremis
Por quoi déusse estre enemis
Dant Ysengrin mon chier compere,
Ne onques par l’ame mon pere
A sa feme ne quis folie,
Si l’a moult por moi asaillie.
Tot en sui-je prest de deffendre
Se nus m’en voloit entrependre :
Jel’ vos di bien sanz autre faille,
O par juïse, o par bataille,
Einssi con s’en esgardera
Et que la Cort le jugera.
Ysengrin est sailliz en place,
Prie le Roi ne li desplace,
Sa droiture vodra prover
Tot sanz mençoigne controver.
Noble conmande que il die,
N’i a celui qui contredie.
Renart, dist Ysengrin, entent,
Je sui cil qui son droit atent
Des granz anuiz que tu m’as fez
Que nos avons céans retrez :
Ne me sont encor amendé,
Si l’avoit li Rois conmandé.
Moult as einz fet bestes pener
Q’à Cort te poïst amener ;
Et des jones et des chanuz
En as assez por fol tenuz
Por ceuls qui de toi clamor font
Et qui ci enprès toi estont
Par moi qui par toi sui honiz
Voil que cest plet soit hui feniz.
Par la verité m’en irai,
Jà, se Dex plait, n’en mentirai
Que je n’en die tot le voir
Se je le puis apercevoir.
Je n’ai mestier de fere alonge
Ne de controver ci mençonge :
De traïson te proverai
Si que garant en troverai,
Et mosterai tot par raison
Et felonie et traïson.
Bien te sauré l’achaison dire
Se t’en voloies escondire.
Renart respont, bien dit avez,
Or dites conment le savez.
Fet Ysengrin, bien le dirai,
Jà mot ne vos en celerai.
Mes conperes estes en loi,
Si m’avez mené à besloi
Plus de cent fois, que je n’en mente ;
Mainte beste avez fet dolente,
Bien l’ont plusors apercéu
Que mainte foiz m’as decéu.
Or sai bien, se cuers ne me faut,
Nos somes venu à l’asaut.
Moult ai par toi mal endurez,
Mainte foiz t’en ies parjurez ;
De ma feme m’as malbailli.
Ce dist Renart, tu as failli,
Onques à ta feme nel’ fis,
Ne vers toi de riens ne mesfis.
Dist Ysengrin, certes, Renart,
Jel’ mosterrai de moie part
Que vos à force l’assaillistes,
Au troz trover pas ne faillistes ;
Voiant moi ou vosisse o non,
Li batistes bien le crepon.
Moult vos vi boter et enpeindre
Et durement la coe estreindre.
Iloc la tenistes por sote,
Ne senblot pas jeu de pelote :
Ce ne porroies pas deffendre
Ne vos en véisse descendre
Et vos braies sus remonter.
Ne m’est honte del’ raconter,
Mès se je celer le péusse,
A nul hui dire nel’ déusse.
Ce dist Renart, jà Diex ne place
Le Créator que tant me hace
Qu’aie fet tel desconvenue
Que ma conmere aie ferue
Plus bas de l’ueil si con vos dites,
Donques seroie plus qu’erites :
Ou puet-on bien de fi savoir
Que vos ne savez honte avoir,
Que ce avez amentéu
Dont li autre se sont téu.
Jà n’en déussiez fere conte
Qui à lui tornassent à honte ;
Mès bien avez tel chose aprise
Que honte avez arere mise.
Bien avez vergoigne adossée
Qui honissiez vostre espousée.
Le bouter et le soufachier
Fis-je tot por lui fors sachier :
Enpaindre et traire me véistes,
Bien sai que mal i entendistes ;
Mès je nel’ fis se por bien non,
Or m’en rendez mal guerredon.
Jel’ fis por bien et por franchise,
Mès or ai perdu mon servise,
Que fous fui quant m’en entremis,
Or en estes mes enemis.
Renart, de tant te pos vanter,
Bien sez à fol messe chanter,
Ce est bien chose connéue,
Mainte honte ai par toi éue :
Tu es de tel autorité
Qu’en toi n’a point de verité.
Tant me conseillas en l’oreille
Qu’entrer me féis en la seille
Et avaler el puis dedenz,
La male gote aies es denz ?
A tantes rien as-tu fet honte
N’est nus qui en sache le conte.
Tu déis que Roi porrois estre
Laiens en Paradis terrestre
Où il avoit gahaingneries
Et bois et plains et pescheries :
Nus ne séust riens demander
Qu’en ne péust laiens trover,
Et qui voloit mengier poissons,
Ou luz ou truites ou saumons,
Tant en avoit con li plaisoit,
A son talent les eslisoit,
De toz biens ert li leus garniz.
Einsi fui par toi escharniz.
Je cuidai que déisses voir,
Mès je ne fis mie savoir :
Moult m’engignas à icele ore,
El séel entrai sanz demore,
Et la corde se destorteille,
Tu ieres jà en l’autre seille.
Je fui pesanz et tu legiers,
Traïtres es et losengiers :
Je avalai et tu montas,
Qant enmi le puis m’encontras
Dont fu mes cuers iriez et grains,
(Moult es de felonie plains)
Je demandai que tu queroies ;
Tu me déis qu’en mont iroies,
C’est costume que chascuns tient,
Qant li uns vet, li autres vient.
D’enfer estoies eschapez,
Et je i remès entrapez :
Illec remès, tu t’en issis,
Tel traïson de moi féis.
En l’eve soffri grant moleste,
Trois foiz me reclost sor la teste.
Moult i endurai grant mesese,
De boivre estoie asez aése.
Li blanc moine me traitrent fors,
Mès tant me batirent le cors
O potences et o bastons
Qu’il me mistrent à ventrillons.
De pex me firent tel aport
Qu’iloc me lesserent por mort ;
En un fossé qui ert pulens
Par la coe me trestrent ens
Et après s’en sont retorné.
En ort leu m’orent ostelé,
De poor dui estre crevez,
Moult ai esté par toi grevez.
D’iloc me parti à grant peine,
Ge ne pooie avoir m’aleine ;
Encor m’en dolent tuit mi membre,
Moult sui dolenz qant il m’en membre.
Tu me féis aler peschier
Et en l’eve tant acrochier,
Tote la coe oi engelée
Et en la glace séelée ;
Ne m’en péusse departir
Sanz la coe perdre au partir.
Ysengrin, di le tu acertes
Que tu éus par moi ces pertes ?
Par foi tu paroles à force,
Ta lecherie t’en fist force ;
Tu estoies si besoingneus
Et de poissons si convoiteus
Jà n’en cuidoies prou avoir.
Voir dist li livres et savoir,
Qui tot covoite trestot pert,
Ce t’os-je bien dire en apert,
Tiex cuide avoir tot à sa part
Qui del tot s’en desoivre et part.
Moult est honis qui tot covoite,
Qar son gaain pert et le jete :
Dès que tu les poissons sentis,
Di moi por qoi tu t’alentis ;
O dous ou trois en revensisses,
Mès por escharniz te tenisses
Se tu n’en fusses toz chargiez
Et por itant fus atargiez.
Qant del venir t’alai semondre,
Lors conmenças un poi à grondre ;
Qant je fui anuiez d’atendre
Si te lessai as poissons prendre :
Se mal t’en vint por qoi m’en blasmes ?
Onques des poissons n’en menjasmes.
Renart, bien te sés escuser,
Et gent par parole amuser :
Ne porroie hui avoir retret
Les max que tu m’as dit et fet,
Toz tens m’as tenu por bricon.
Un jor que mangai d’un bacon,
Grant talent avoie de boivre,
Là me séus-tu bien deçoivre :
Tu me déis que d’un celier
T’en avoit-on fet celerier ;
En ta garde estoient li vin
Toz tens au soir et au matin.
Là me menas, Dant fel cuivers,
Tu m’as chanté de maint fax vers,
Là me menas-tu conme fol,
Assez i oi batu le col.
Ce dist Renart, or as-tu tort,
De ce sui bien en mon recort,
Que tant béus que toz fus ivres,
Si te vantas que tot sanz livres
Chanteroies bien un conduit ;
Lors conmenças à si grant bruit
Que tuit cil de la vile vindrent
Qui à grant merveille le tindrent.
Qant j’oï la noise venir,
Nus nel’ me doit à mal tenir
Se me mis tantost au grant cor,
Qar de morir oi grant péor :
Retenuz i fui par un poi,
Mès je m’en ving au mielx que poi.
Avoir nos durent entrepris,
Car moult nos avoient sorpris ;
Se fus batuz, à moi qu’en tient ?
Qui mal chace, mal li avient.
Renart, fet-il, moult sés de bole,
Tu t’ies jetez de meinte fole :
Renart, moult ies de male part,
Là me tenis-tu por musart
Où tu me féis la corone
D’eve chaude conme à persone
Si grant et si ample et si lée
Que tote oi la teste pelée ;
Ne me remest poil sor les joes,
Tu t’en alas fesant tes moes :
De moi devoies moine fere.
Certes moult ies de mal afere,
Par toi est ma char afeblie,
Aillors te crui, si fis folie.
Un tronçon me donas d’anguille
Qu’éus conquise par ta guille,
Por moi esprendre et alechier,
En meint leu m’as fet trebuchier.
Je demandai où la trovas,
Por moi deçoivre controvas
Que charetier tant en portoient
A bien petit qu’il nes gitoient ;
Por fol avoie tant targié
Qu’outre mesure orent chargié :
Sovent s’aloient arestant,
Des anguilles i avoit tant,
Li cheval tiroient à paine
La charete qui trop ert plaine
Je demandai par quel semblance
En péusse remplir ma pance ;
Tu me déis qant te troverent,
Qu’en lor charete te giterent
Et prierent q’assez menjasses
Et que le remanant gardasses.
Tant m’en alas amonestant
Que je lor ving tot au devant,
Si fis senblance d’estre mort.
Lors refui-je batus si fort
Et de leviers et de bastons
Qu’encor m’en delt tot li crepons ;
N’est merveille se j’oi anui
Qant de toi vengiés ne me sui.
En un des plus lons jors d’esté
N’auroie-je pas reconté
Les max, les anuiz que m’as fet ;
Mès ore est tant mené li plet
Que à Cort en somes venu.
Se par droit en somes tenu,
De toi aurai encor venjance,
Bien en ai en Dieu ma fiance.
Je t’ai menée loiauté
Et tu à moi desloiauté :
Qant m’estordras, que que nus die,
Petit valdra ta renardie.
Renart respont par bon confort,
Sire Ysengrin, vos avez tort ;
Vos m’encusez ne sai de qoi,
Cil autre baron sont tuit qoi
Qui vos oent, ne dient mot,
Tels i a vos tienent por sot.
Vostre raison est descoverte
Que mençonge avez dite aperte,
Et cil qui trop ment s’ame pert.
Ahi ! Renart, trop ai sofert
Ton grant orguel et ton desroi,
Mès se j’en ai congié del Roi,
Jà auras la bataille à l’oil.
Renart respont, riens tant ne voil.
De bataille son gage tent.
Ysengrin et li Rois le prent,
Renart après le suen tendi
Si que li Rois bien l’entendi.
Bien dient li baron sanz dote
Que la bataille i afiert tote
S’or ne set Renart d’escremie
Mar vit la bataille aramie.
Li Rois demande les ostages,
Qui moult estoit cortois et sages,
A nul d’els nes a pardonés.
Ysengrin a les suens livrés,
Por lui a fet Brun l’Ors entrer,
Tybert li Chaz et Chantecler
Et le Lievre sire Coart :
Cels met Ysengrin de sa part.
Renart en r’ot des miex senez
Que il ot à sa part tornez ;
Bruiant et Baucent le Sengler
Qu’il ot fet o soi asenbler,
Et Espinart le heriçon,
Grinbert son cosin le Tesson :
Cil furent à Renart secors,
Moult en pesa à Dant Brun l’Ors.
La bataille ont aterminée
A quinze jors sans demorée.
Grinbert acréanta moult bien
Qu’il ne leroit por nule rien
Que Renart ne face conbatre
Por l’orgoil Ysengrin abatre.
Li Rois a dit, tenez nos pès,
A vos ostiex alez huimès.
Li baron se sont departi,
Malement ont le chanp parti
D’entre Renart et Ysengrin
Qui moult estoient mal voisin.
Renart n’iert pas de tel puissance
Con Ysengrin, mès sa fiance
Avoit Renart en l’escremie,
Por ce ot la bataille aramie.
Engigneus est, mès n’est pas fort,
Se Ysengrin li fet effort,
De l’entre-deus se set covrir
Et bien tapir por descovrir
Son conpaignon qant il voit ese
De faire chose qui li plese.
Tant s’est entremis del aprendre,
Ne l’en porroit nus entreprendre.
Tant sot Renart d’engins plusors,
De luite, de jambet, de tors,
Ainz qu’Ysengrin baillier le puisse,
Li brisera ou braz ou cuisse.
Ysengrin entent moult à el,
En pez se gist en son ostel,
Qar el droit que il a se fie
Et Renart en son cuer desfie :
Se il le puet as poinz baillier
Forment le cuide travaillier.
Moult desire que li jors viengne
Que en sa bataille le tiengne.
Moult li desplest en son corage
Que la bataille tant li targe :
Jà ne cuide mès véoir l’ore
Que ele soit, tant li demore.
Renart refu en moult grant paine
D’armes conquerre la semaine,
Et Ysengrin tot ensement
Armes porchacent à talent :
En grant porchaz est del haster
Et en poine del aprester ;
Son écu et s’autre arméure
Tot a quise et afeutréure,
Chausces et janbieres bien fetes
Que il a en ses jambes traites.
Ses escuz est vermeuls trestoz,
Et la cote roge desoz :
Baston ot de neflier bien fet,
Bien fu armez au jor de plet.
Renart qui maint a escharniz
Ne restoit mie piz garniz :
Asez avoit de buens amis
Qui de lui se sont entremis ;
Escu roont à sa manere
A conmandé que l’en li quere :
Un l’en ont quis qui fu toz jaunes.
En sa cote n’ot pas deus aunes ;
Moult fu bien fete et aïesée,
N’ot chauce ne fu gambaisée :
Un baston ot d’une aubespine
Qui moult estoit bons en plevine.
En lui fu moult bien enploiez,
De coroies fu bien liez
De chief en chief jusqu’au somet :
Issi armez à la Cort vet
Ysengrin s’en iert jà tornez
Qui moult estoit bien atornez.
Estes-vos en la Cort Renart,
Et Ysengrin de l’autre part ;
Et li baron furent ensemble,
Chascuns a dit ce que li senble.
Renart ne fu pas esperduz,
Haut fu roingniez et bien tonduz ;
Et col et barbe se fist rere
Por le desdain de son conpere.
Ysengrin l’ot en grant despit,
Et sa force prisa petit,
Ainz n’i daigna oster chevoil.
Jà fussent ensenble son voil,
Moult desire q’as poinz le tiengne,
Jà ne cuide qu’a tens i viengne ;
Mès einz que il le tiegne as mains
Sera plus malades que sains.
Hermeline fu en fréor,
Por Dant Renart et en péor :
Moult par estoit la dame franche.
Et Perce-haie et Malebranche
Et Renardiax, tuit li troï frere
Fesoient grant duel por lor pere
Avec lor mere en la tesniere,
Por Renart font à Dieu priere ;
Chascuns d’els Diu proie et aore
Que il le garisse et secore
Et de mal engin l’escremisse
Q’en la bataille ne perisse.
Einsi si fil en sa meson
Font chascun à Dieu oroison
Por lor pere qui tant les aime,
Qant il les voit, biax filz les claime.
Hersent prie por son segnor
Que Diex li face tel onor
Que jà de la bataille n’isse
Et que Renart vaincre le puisse,
Qui moult soef li fist la chose
En la tesniere où ert enclose.
Jà par lui n’en issist conplainte ;
Mès Ysengrin qui l’ot atainte,
En fist conplainte, ce li poise,
Moult a en lui franche borjoise.
Tuit sont à Cort et povre et riche,
Ysengrin metra en la briche
Renart, s’il puet, en la bataille,
N’i valdra sis engins maaille.
Qant Nobles vit la gent venue
Là où la bataille ert tenue,
Brichemer fet avant venir
Por recorder et retenir
Le jugement de la bataille,
Et prie que par le droit aille.
Brichemer est venuz avant
Et dist qu’il fera son conmant :
A sei a tret troi des barons
Qui moult estoient de granz nons.
Li Liéparz i fu li premiers
Qui moult estoit estoz et fiers,
Et Baucent qui ot gent le cors
Et messires Bruianz li Tors.
Cil quatre sont avant venu,
Por les plus sages sont tenu
Qui cel jor fussent en la place.
N’i a celui qui bien nel’ face
Por un grant jugement tenir
Et por un grant fès sostenir.
Cil quatre vont à un conseil :
Dist Brichemers, moult me merveil
Que Renart osast ce penser
Dont nos l’oïmes encuser
A Roonel et à Tybert
Et à Brun l’Ors qui moult nos sert ;
Des autres clamors i a tantes
Que je ne sai à dire quantes.
Pinte se pleint et Tiecelins,
Tot ce prist sor soi Ysengrins,
Por trestoz a doné son gage
Et si en a livré ostage
Que il hui connoistre li face,
Se il le nie, enmi la place.
Segnors, qui péust apesier,
Le mal oster et abessier,
Ce fust grant sens, ce m’est avis :
Ai-je bien dit ? Que vos est vis ?
Baucent respont, bien avez dit,
Tuit l’otroient sanz contredit.
Tuit quatre en sont venu au Roi,
Si li dient tot en reqoi :
Sire, vostre baron loassent
Que cil champion s’acordassent ;
Sauve t’onor et ta querelle,
Moult tenisson la pès à bele.
Moult plest au Roi ce qu’il ont dit,
Jà par lui ne seront desdit :
Seignor, fet-il, or en parlez,
Ysengrin premier apelez,
Du tot la querele à lui tient,
A moi noient n’en apartient
Fors solement de droit tenir,
Del sorplus vos lais covenir.
Moi ne poise se il s’acordent,
Ne voil que por moi se descordent :
Miex ainz la pès d’eulz que la gerre
Se la poez entre els conquerre.
Qant Brichemer l’a entendu,
Tornez s’en est col estendu,
A Ysengrin dist à l’oreille
Que li Rois forment se merveille
Qu’en ne puet pez entre els deus metre
Ne por donner ne por prametre,
Face le bien, pregne droiture
De Renart por sa forfeture,
Et por ce que il sor li mist
Que à sa feme force fist.
Dist Ysengrin, n’en parlez pas,
Je voil qu’en m’arde en-es-le-pas
Qant je à lui prendré acorde :
Ne voil qu’autre foiz s’i amorde
A fere honte à son conpere,
Ne à pel gesir sa conmere,[7]
Je verrai bien qui me fet droit.
Brichemer dist que il vodroit
Que la chose fust si menée,
Si déduite et si atornée
Que entr’els deus fussent amis.
Let est qu’il soient ennemis,
Si que chascuns son droit éust,
Que à mal torné ne li fust.
Dist Ysengrin, jà Dex ne place
Que je pès ne acorde face
De si qu’en voie le plus fort
Et sache liqueus en a tort :
Bien me porra tenir por yvre
Se je l’en lès partir delivre.
Dites le Roi et son barnage,
Que ce sachent et fol et sage,
Que por noient la pès requiert.
Jà de si el champ fete n’iert :
Chascuns dira ce qu’il vodra,
El champ verron qui meus vaudra.
Dites le Roi que droit me tiegne,
Bataille aura conment qu’aviegne.
Qant Brichemer ot en la fin
N’en aura pès vers Ysengrin,
Au Roi a dit cele novele
Par qoi s’ire li renovele.
Sire, fet-il, à moi entent,
Ysengrin sa bataille atent
Qui n’a talent de fere pès :
Honiz soit qui en fera mès
Nule acorde se el champ non,
L’en en tendra l’un à bricon.
Or est li plet moult enpiriez,
Que li Rois si s’est corrociez
De l’orgoil qu’Isengrin li dist
Qant de pès fere s’escondist.
Dist Brichemers, se vos volez
Droit fere si con vos solez,
De vos tenez la droite voie ;
Ce est le miex que ge i voie,
Q’ambedeus les metez là fors,
Penst chascun de garder son cors :
Qant il seront enmi la place
Qui miex fere porra si face.
Ce dist li Rois, par Saint Richier
Por verté vos os afichier
N’en prendroie pas l’avoir
Que li plus riches puist avoir
Que je la bataille n’en aie,
Jamès n’aurai en els manaie :
Ne sai qu’alés plus atendant,
El champ les metés, jel’ conmant.
Qant la parole eut recitée
De la bataille et recontée,
Si les ont mis el champ ensemble :
Li plus hardiz de péor tremble,
L’un tenoit l’autre par la main.
Li Rois apele un chapelain,
Mon seignor Belin le Moton ;
Moult est sages, pas n’en doton.
Cil aporta le seintuaire
Sor quoi durent serement faire.
Li Rois a fet crier son ban
N’en n’i ait nul de tel boban
Qui face noise, en pès se tiengne,
Conme prodome se contiengne.
Moult est li Rois de grant justice,
Del serement fet la devise :
Dant Brichemers et Brun li Ors
Que l’en tenoit as deus meillors,
Deviserent le serement
Devant trestoz apertement.
Seignor, fet-il, or m’entendez,
Si je di mal, si m’amendez :
Renart jurra premierement
Et fera tot le serement
Qu’à Ysengrin n’en a tort fet,
Ne à Tybert le Chat forfet,
N’à Tiecelin n’a la Mesenge,
N’à Roonel ne fist laidange,
Ne à Bruiant n’à Chantecler,
Touz les i estovra jurer.
Longuement fu à oroison
Et fu en grant aflicion.
Renart, fetes le serement
Ci oiant nos apertement.
Renart s’ajenoille en la place,
Moult s’apareille et se rebrace ;
Desor les Sains estent sa main,
Si a juré par Saint Germain
Et par les Sainz que iloc voit
Que cel plet nul tort n’avoit :
Les Sains bese, puis si se lieve.
A Ysengrin durement grieve
Ce qu’il fet acroire por voir
La mençoigne par son savoir.
A jenuz s’est à terre mis,
Dist Brichemer, biax doz amis,
Vos jurez que Renart est faux
Del serement, et vos loiaux.
Dist Ysengrin, je le créant ;
Les Sainz bese. Tot maintenant
S’est redrechés, puis si s’en vet
Enmi le champ, s’oroison fet
Et prie Dieu que tot sormonte,
Que il li doinst vengier sa honte
Si qu’au partir honor en ait
De Renart qui li a fet let :
Baise la terre, si se dresce,
Son baston afete et adresce,
En plusors sens le retornoie,
En sa main la corroie ploie.
Son escu prent et puis se moille
En plusors leus, son baston crole ;
Tot entor encline à la gent,
Moult se deduit et bel et gent :
A Renart dist que il se gart
Qu’il ne mete le jor à gast.
Qant Renart l’ot, del cuer sospire,
Tot s’est téus, n’ose mot dire ;
Renart sot letres dès enfance,
Moult ot oï de nigromance,
Tant ot entendu puis aillors
Qu’ot oblié les moz meillors.
Renart ne fu pas esmaiez,
Son baston prent con afaitiez ;
Gentement le sot à soi trere,
Bien fu apris de tel afere.
En plusors sens l’a essaié,
N’a pas senblant d’ome esmaié ;
En ses doiz la coroie lace,
Après se dresce enmi la place.
Son escu prent, si fu séurs
Conme chastel enclos de murs.
Li escremir li est moult biax
Que toz en set les enviaux :
Son escu sor sa teste tient,
Se Ysengrin près de lui vient ;
Tel escremie li donra
Qui à grant honte li vendra.
Ysengrin est de grant aïr,
Moult tost l’est alé envaïr :
Renart, fet-il, mal es bailliz,
Toz jors mès je soie failliz
Se ne me venz de la vitance
Que me féis par sorcuidance
Qant tu à ma feme géus
Et à force la porqéus.
Renart respont, sire, mal dites,
Otroiez que je soie quites,
Fere vos feré grant homage
As Chevaliers de mon parage,
Puis iré por vos otre mer,
Se me fetes quite clamer.
Renart, fait-il, ne te travailles,
Je ne croi que tu noient vailles ;
Qant tu de mes mains torneras,
Jà puis ne me ramponeras.
Renart respont, c’est devinaille,
Bien verron à la definaille
Lequel que soit plus decéu.
Dist Ysengrin, trop ai vescu
Se de vos ne me puis vengier ;
Et dist Renart, or voi dangier,
Qu’alez tote jor menaçant,
Mès asailliez de maintenant.
A cest mot Ysengrin acort,
Renart n’a talent qu’il s’en tort,
Son escu tint devant son front,
Met pié avant, covre son gront ;
Moult le vet Ysengrin hastant,
Renart se vet bien defendant :
Ainz qu’Isengrin part de l’asaut
Le fiert Renart que pas ne faut,
Tel cop lez l’oreille li done,
Tote la teste li estone.
A cel asaut moult bien li chiet,
Si chancele qu’à poi ne chiet.
Qant sa teste a véu seignier
De sa main se prist à segnier,
Dieu prie qui ne faut ne ment
Que il le gart d’afolement :
Par sa feme est, ce dist, traïs.
Longement fu si eshahis
Que il ne sot quel ore estoit,
S’est nuit ou jorz, quel tens fesoit,
Por le cop qu’il ot recéu.
Renart l’ot bien apercéu,
Ne fait senblant qu’il le séust
Ne que apercéu l’éust,
Mès d’autre part torne sa chiere,
Encor se gart qu’il ne le fiere,
S’il en pot leu ne ese avoir,
Encor li fera mels savoir,
Qar n’a talent de lui atrere,
En sus le fera de lui trere :
Ne li laira pas aprochier,
Au baston se set esmochier.
Dant Ysengrin de loin regarde,
Renart li dist por qoi il tarde,
Q’à la bataille ne revient,
Bien set qu’à fere li covient.
Ysengrin se r’est porpensez,
Bien set qu’il a esté grevez :
Avis li est que trop demore,
Isnelement li recort sore,
Met pié avant, jete retrete,
Mès durement Renart se guete.
Ysengrin jete, pas n’areste,
De son baston vole la teste,
Met pié ariere, si s’en part.
Renart qui set assez de fart,
Li avoit dit, sire Ysengrin,
Diex qui sor toz est voir devin,
Set bien quel droit vers moi avez,
Baston vos faut, si nel’ véez ;
Qar feson pès à mon seignor
Ainz que vos tort à deshonor.
Dist Ysengrin, faites moi tondre
S’assez n’en ai por vos confondre.
Qant assez ramponé se furent,
Li dui baron el champ esturent ;
Derechief andui s’entrevienent,
Lors escu moult cointement tienent.
Ysengrin giete et fait son esme
Que gieter voille par mi elme ;
De lui grever moult s’entremet,
Entre l’escu son baston met :
Enmi le champ son escu laisse,
Et Renart son baston eslesse.
Tel cop li done ainz qu’il le tiegne,
Jamès n’ert jor ne l’en soviegne,
Le bras senestre li a frait,
Or a Ysengrin mauvès plait.
Andui ont lor escu gerpiz,
Si s’aerdent parmi les piz,
Longement furent en estant,
En plusors sens se vont hastant.
Ne véistes genz si combatre,
Li uns ne pooit l’autre abatre,
Mès nus ne s’en doit merveillier
Qu’Isengrin ne se pot aidier
Fors solement de son bras destre,
Que perdu avoit le senestre.
Li uns torne, l’autre trestorne,
Li uns ne l’autre ne séjorne,
Moult tornent ainz que nus en chie.
Ysengrin sueffre grant haschie,
Les denz a un poi plus agues
Que Renart et plus esmolues :
Contre Renart moult se herice,
Bien li descire sa pelice :
Renart li fait un tor d’Englois,
Ysengrin nel’ doutoit ançois ;
Renart l’estraint, pas ne se faint,
Jambet li fet, de li l’enpaint,
A la terre le giete envers,
Renart jut sus tot en travers,
Les denz li brisa en la bouche,
En la chiere li crache et moche,
Es eulz li boute le baston
Et poile as ongles le grenon ;
Traire li a fait male fin,
Puis li a dit, Dant Ysengrin,
Encui sauron qui droit aura
Et qui miex fere le saura,
De vostre fame m’encusez,
Certes moult estes aviliez
Qant issi por vostre moillier
Faites moi et vos traveillier.
Ysengrin ot qu’il le laidange,
Moult ert dolent s’il ne se venge :
Ce poise li, n’en puet plus fere.
Renart li fait honte et contraire,
Renart li fait du tout son miex
De la poudre voler es eulz ;
Mès entre ses denz se demente
Et dit, fox est qui met s’entente
En fame n’en riens qu’ele die,
Poi sont de fames sanz boidie :
Par fame est plus noise que pais,
Jà la moie ne croirai mais.
Fame fait haïr pere et mere,
Fame fait tuer son conpere ;
Par fame sont honi maint home,
De toz les max est fame some,
Fox est qui trop i met s’entente.
Ysengrin einssi se demente,
Einssi se complaint malement.
Renart le fiert menuement
Et sor les eulz et sor la face,
Le poil et le cuir en esrache :[8]
Bien voit qu’il est en male trape.
A cest mot le baston eschape
Que Renart tenoit en sa main.
Cil qui n’ot pas le cuer trop sain
Se volt lever, mès ne pot estre,
Qu’il n’ot vertu fors du braz destre.
Renart li fet honte et anui,
Soufrir l’estuet, ce poise lui :
Bien le voudroit avoir conquis,
De la poudre li jete el vis.
Ysengrin tient por non sachant,
Andeus li va les eulz cerchant ;
Mès par sa grant mesaventure
Li avint tel male aventure,
Ses doiz en la bouche dedenz
Li chiet, et cil le prent as denz,
La char li trenche jusqu’à l’os,
Ses braz lace derier son dos,
De l’estraindre pas ne se faint.
En tele guise le destraint
Que voille ou non le fet descendre
Et desoz lui le fet estendre.
Or est Renart en tel trepeil,
S’il a péor ne m’en merveil :
Ysengrin des genouz le serre.
Renart ne voit ne ciel ne terre,
Juré avoit faux serement,
Si li parra prochainement
Con fause loi il a menée.
Hui est venue sa jornée,
Merci quiert por les Sains de Rome,
Mès ne li vaut mie une pome,
Que Ysengrin le fiert et maille,
Et Dant Renart gient et baaille.
Ysengrin le fiert en la chiere,
Ne tient pas sa main vers lui chiere.
Renart n’a pooir del deffendre,
Tot li covient soufrir et prendre
Icele angoisse et icel mal,
Traire li fait Ysengrin mal :
Il vosist miex estre aillors
Que il soufrist si grant dolors.
Devenuz est plus froiz que glace,
Miex velt morir, ce dist, en place
Que por lui recréant se claint.
A cest mot a gité un plaint,
Au cuer sentoit moult grant anui
Plus qu’il ne cuidoit sentir hui,
Que en lui n’avait point d’effors,
Semblant fet d’ome qui soit mors.
Ysengrin à ses poinz le sache,
Moult le descire et le desache ;
Renart ne muet ne piez ne mains,
Bien fet semblant qu’il n’est pas sains.
Ysengrin l’a batu si fort
Que el champ le lesse por mort :
Li baron sont de lui parti.
Atant la Cort se departi,
Ainz Troien n’orent tele joïe,
Qant reçurent Elaine à Troie,
Con Brun li Ors et Tiecelins
Et Chanteclers et Ysengrins,
Tyberz li Chaz et Rooniaus
Et li Dains mesire Platiaus :
Fors de Renart nus nel’ véist,
De rire tenir se poïst.
Li parent Renart ont grant honte,
Nobles n’en velt oïr le conte,
Ainz conmande que l’en le pende.
Tybert li Chaz les eulz li bende,
Et Roonel les poinz li lie,
Bien ont Renart en lor baillie.
De pasmoisons est revenuz,
Bien li en seroit avenuz
Se de lor mains poïst partir,
Jamès n’iroit home aatir ;
Tote la Cort oïssiez bruire,
Moult se hastent por lui destruire.
Renart por sa vie tenser
Prie qu’en le laist confesser,
Qar à regehir li covient
Les pechiez dont il se sovient.
Lors li firent venir Belin
Par la priere son cosin,
Le Tesson mon seignor Grimbert
De grant duel a le cuer covert.
Renart se fist à lui confès,
Et cil l’en a chargié son fès
Selonc les pechiés qu’il a fès
De qoi il a vers Dieu meffès.
Si con il confessoit Renart,
Atant es-vos frere Bernart
Qui de Grant-Mont est repairiez,
Trova Grimbert qui fu iriez ;[9]
Enquis li a et demandé
Que li Rois en a conmandé.
Biau sire, que tost soit penduz,
Par nului ne soit deffenduz.
Qant li freres ot la parole,
Moult li poise se l’en l’afole :
Il ert de grant franchise plains,
Moult ert cortois, n’iert pas vilains.
Renart l’a bien aparcéu
Au grant duel qu’il en a éu,
Que maine Grimbert li Tessons
Et Espinarz li Heriçons,
Que Dant Renart demandera,
En sa meson moine en fera.
Là où vit Nobles belement,
Le salua moult doucement.
Nobles s’est levez en estant,
Car ne set frere qu’il aint tant,
De joste lui l’a asegié.
Frere Bernart li a proié
Que por Dieu otroit, s’il li plest,
Que vif et sauf Renart li lest :
(Et Noble regarda le frere)
Por Dieu, sire le devez fere ;
Ne puet aler à Dieu le grant
Qui ne pardoinst son mautalent.
Jhesu-Crist pardona sa mort,
A lui devez prendre confort.
Itel conseil vos voil doner
Que vos lessiez Renart aler ;
Aiez merci du pechéor
Se vers Dieu a aucune amor.
Moult deproia l’Emperéor
Que Renart li doinst par amor :
Por ce, fet-il, sui-je venuz,
Proier vos voil ne soit penduz,
Ançois le m’en lessiez mener.
Diex le vos puist guerredoner !
Donez le nos à Dieu servir
Qui por nos se lessa morir,
Et por nos fu en croiz penez,
Por ce pardoner li devez.
Jel’ quit fere moine ordener,
En tot le mont n’aura son per.
Le frere dist l’Emperéor,
Diex ne velt mort de pecéor,
Mès soit confès et se gart bien,
Qu’il sera sauf je n’en dout rien ;
S’il est retez de gorpillage
Il est au meins el repentage :
Or ne m’en refusez le don,
Donez le moi par guerredon.
Nobles entent que bien a dit,
Nel’ voudroit avoir escondit
De riens que il li demandast
Ne que à fere conmandast,
Renars li rendi bonement
Sanz nul autre contendement.
Renart a geté de prison,
Frere en a fet en sa meson :
Poissons li done por amordre,
Bien le doctrine de lor Ordre,
De dras à moine l’ont vestu.
Le fil a putain, le vaincu,
Ainz quinze jors fu-il gariz ;
Cil qui tant a esté mariz
Toz fu gariz et respassez,
Par mains mauvès pas est passez.
Bien retient ce c’on li enseigne,
Ne fet pas sanblant qu’il se faigne :
Les signes fet del moniage,
Moult le tienent li moine à sage,
Chier est tenuz et moult amez.
Or est frere Renart clamez,
Et si fet moult le papelart
Tant que s’en puisse issir par art.
Moult est Renart de bel servise,
Volentiers vet à Seinte Iglise.
Sovent li menbre des jelines
Dont il selt rungier les eschines.
A peine tient estacions,
Car sovent a tentacions.
Bien li séent si vestement,
Moult se deduit onestement,
Si met s’entente à l’Ordre prendre,
Il n’a en lui riens que reprendre.
Ore est Renart devenuz moines,
Grant travail soefre et granz paines
De jéuner et de veillier,
De chanter et de verseillier.
Un jor fu la messe chantée,
Renart de cuer l’ot escotée,
Tot dereniers ist du mostier,
En sa main tenoit un sautier.
Quatre chapons bien sejornez
Lor avoit un borjois donez
Qui avoit non Tiebaut li riches :
N’iert pas vers els avers ne chiches.
Renart les a apercéuz,
Or sera-il bien decéuz
Se il n’en fet ses grenons bruire,
Belement s’en quide deduire.
Par Dieu, fet-il, ne m’apartient
Cil qui de char mengier se tient,
N’ai pas fet veu de mengier char,
Moult le tendroie à grant eschar
Qui cest veu fere me feroit,
Diex le set, moult me mesferoit.
De char ne me puis atenir,
Se je en puis en leu venir,
Je mosterrai que je sai fere,
Qui qu’en doie parler ou tere.
Li jorz trespasse et la nuit vient,
Renart qui des chapons sovient
Ne les pot metre en obliance :
Tote trespasse obedience,
Vient as chapons, si les desjoche,
L’un en menjue, au cuer li toche ;
Les autres trois a mis en terre,
Que lendemain les vendra querre.
Covert les a bien d’estraier,
Ariere s’est venuz couchier.
Nus ne sot rien de son aguet
Ne del larecin qu’il ot fet :
Si li chaï par aventure,
Moult retret bien à sa nature.
Lendemain après les matines
Renart qui tant eime jelines,
D’un des chapons se r’est dinez,
Puis est el cloistre retornez.
Li tiers menja que nus nel’ sot,
Au gart mengier iluec passot
Uns freres qui bien aperçoit
Que Renart li ros les deçoit.
Qant reconté fu au covent,
Renart en eut blasme forment,
Et il lor en vost droit offrir,
Frere Bernart nel’ pot soffrir,
Jà r’avoit mengié un corbel
Qu’il avoient en lor prael :
Tant larecins lor avoit faiz
Que bien sorent qu’il ert mesfaiz.
A Renart ont tolu les dras,
Congié li donent, tot fu gras ;
Ne demandoit nule autre riens
Ne mès qu’il fust hors de lor meins.
A merveille lié s’en fesoit,
Car li Ordres li desplesoit :
Tornez s’en est par un chemin,
Encor nuira à Ysengrin
Que il het de trestot son cuer,
Amer nu porroit à nul fuer.
Li moigne s’en va à la voie,
Toz seus s’en va, nus nel convoie :
Moult menace ses anemis
Par qui il fu en peine mis.
Sa teste jure coronée
Que jà s’ire n’ert pardonée
A Ysengrin ne à Tybert
Par qui il a tant max sofert.
Roonel ert en une haie,
De loing le voit, forment s’esmaie,
Si s’escrie, vez le Rendu
Que déumes avoir pendu :
Déables l’ont ore hors mis,
Li moine nel’ volent sofrir.
Cil n’a talent de ramponer,
Ainz s’en prist tantost à aler
Tant que il vint en sa tesniere
Où a trové sa feme chiere ;
Et qant le voit grant joie en a,
Ses deus braz au col li jeta,
Car moult avoit grant duel éu
Que Ysengrin l’avoit vaincu.
Si fil en ont joie moult grant
Qant lor pere voient devant ;
Puis que il est sains repairiez
Chascuns en ert joianz et liez ;
Moult fu bien acesmez li estres.
Renart qui fu rez conme prestres,
Ot moult grant talent de mengier ;
L’eve conmença à huchier,
Et l’en li a tost aportée.
Si filz ont la table posée,
Renart menga moult volentiers,
A grant plenté ot bons mengiers :[10]
Assez menja et fu aaise.
Encore metra à malaise
Mon seignor Ysengrin le Leu
Se il en puet venir en leu :
Or se gart bien Dant Ysengrin
Et Rooniax e Tiecelin,
Bruiant li Tors, Tybert le Chat ;
Se Renart sot onques barat
Il lor fera, que que il tarde,
Tel saut dont ne se prendront garde.
- ↑ Il paroît manquer un vers ici.
- ↑ Nota. L’infinitif est mis ici au lieu de la seconde personne de l’impératif.
- ↑ Audaces fortuna juvat.
- ↑ Voir l’errata
- ↑ Al. Boel.
- ↑ Al. Gengle.
- ↑ Al. La vengance en sera amere.
- ↑ Al. Encor li prie que pais face.
- ↑ Al. Moult se demente, forment plore
Ysengrin maudit et deveure. - ↑ Al. De daintiers.