Les Œuvres de François Rabelais (Éditions Marty-Laveaux)/LeTiersLivre/32

Rabelais

Les Œuvres de François Rabelais (Éditions Marty-Laveaux) (1552)

Alphonse Lemerre, 1870 (Tome II, p. 156-160).

Comment Rondibilis declaire Coquage eſtre naturellement
des apennages de mariage.

Chapitre XXXII.

Reste (diſt Panurge continuant) vn petit poinct à vuider. Vous auez aultres foys veu on confanon de Rome. S. P. Q. R.^[1] Si peu que rien. Seray ie poinct coqu ? Haure de Grace (s’eſcria Rondibilis) que me demandez vous ? Si ſerez coqu ? Mon amy, ie ſuys marié, vous le ſerez par cy apres. Mais eſcriuez ce mot en voſtre ceruelle auecques vn ſtyle de fer, que tout home marié, eſt en dangier d’eſtre coqu. Coquage eſt naturellement des apennages de mariage. L’vmbre plus naturellement ne ſuyt le corps, que Coquage ſuyt les gens mariez. Et quand vous oirez dire de quelqu’vn ces trois motz : Il eſt marié, ſi vous dictez, il eſt doncques, ou a eſté, ou ſera, ou peult eſtre coqu : vous ne ſerez dict imperit architecte de conſequences naturelles. Hypochondres de tous les Diables (s’eſcria Panurge) que me dictez vous ! Mon amy (reſpondit Rondibilis) Hippocrates allant vn iour de Lango en Polyſtylo viſiter Democritus le philoſophe, eſcriuit vnes letres^[2] à Dionys ſon antique amy, par les quelles le prioit que pendent ſon abſence il conduiſt ſa femme chés ſes pere & mere, les quelz eſtoient gens honorables & bien famez, ne voulant qu’elle ſeule demouraſt en ſon meſnaige. Ce neantmoins qu’il veiglaſt ſus elle ſoingneuſement, & eſpiaſt quelle part elle iroit auecques ſa mere, & quelz gens la viſiteroient chés ſes parens. Non (eſcriuoit il) que ie me defie de ſa vertus & pudicité, laquelle par le paſſé m’a elle explorée & congnue : mais elle eſt femme. Voy là tout. Mon amy, le naturel des femmes nous eſt figuré par la Lune, & en aultres choſes, & en ceſte : qu’elles ſe muſſent, elles ſe conſtraignent, & diſſimulent en la veue & præſence de leurs mariz. Iceulx abſens elles prenent leur aduentaige, ſe donnent du bon temps, vaguent, trotent, depoſent leur hypocriſie, & ſe declairent : comme la Lune en coniunction du Soleil n’apparoiſt en ciel, ne en terre. Mais en ſon oppoſition, eſtant au plus du Soleil eſloingnée, reluiſt en ſa plenitude, & apparoiſt toute, notamment on temps de nuyct. Ainſi ſont toutes femmes femmes^[3].

Quand ie diz femme, ie diz vn ſexe tant fragil, tant variable, tant muable, tant inconſtant, & imperfaict, que nature me ſemble (parlant en tout honneur & reuerence) s’eſtre eſguarée de ce bon ſens, par lequel elle auoit créé & formé toutes choſes, quand elle a baſty la femme. Et y ayant penſé cent & cinq cens foys, ne ſçay à quoy m’en reſouldre : ſi non que forgeant la femme, elle a eu eſguard à la ſociale delectation de l’home, & à la perpetuité de l’eſpece humaine : plus qu’à la perfection de l’indiuiduale muliebrité. Certes Platon ne ſçait en quel ranc il les doibue colloquer, ou des animans raiſonnables, ou des beſtes brutes. Car Nature leurs a dedans le corps poſé en lieu ſecret & inteſtin vn animal, vn membre, lequel n’eſt es homes : on quel quelques foys ſont engendrées certaines humeurs ſalſes, nitreuſes, bauracineuſes, acres, mordicantes, lancinantes, chatouillantes amerement : par la poincture & fretillement douloureux des quelles (car ce membre eſt tout nerueux, & de vif ſentement) tout le corps eſt en elles eſbranlé, tous les ſens rauiz, toutes affections interinées, tous penſemens confonduz. De maniere, que ſi Nature ne leurs euſt arrouſé le front d’vn peu de honte, vous les voiriez comme forcenées courir l’aiguillette plus eſpouantablement que ne feirent oncques les Prœtides, les Mimallonides, ne les Thyades Bacchicques au iour de leurs Bacchanales. Par ce que ceſtuy terrible animal a colliguance à toutes les parties principales du corps, comme eſt euident en l’Anatomie.

Ie le nomme animal, ſuyuant la doctrine tant des Academicques, que des Peripateticques. Car ſi mouuement propre eſt indice certain de choſe animée, comme eſcript Ariſtoteles^[4] : & tout ce qui de ſoy ſe meut, eſt diſt animal : à bon droict Platon^[5] le nomme animal, recongnoiſſant en luy mouuemens propres de ſuffocation, de præcipitation, de corrugation, de indignation : voire ſi violens, que bien ſouuent par eulx eſt tollu à la femme tout aultre ſens & mouuement, comme ſi feuſt Lipothymie, Syncope, Epilepſie, Apoplexie, & vraye reſemblance de mort. Oultre plus, nous voyons en icelluy diſcretion des odeurs manifeſte, & le ſentent les femmes fuyr les puantes, ſuyure les Aromaticques. Ie ſçay que Cl. Galen^[6] s’efforce prouuer que ne ſont mouuemens propres & de ſoy, mais par accident : & que aultres de ſa ſecte trauaillent à demonſtrer, que ne ſoit en luy discretion ſenſitiue des odeurs : mais efficace diuerſe procedente de la diuerſité des ſubſtances odorées. Mais ſi vous examinez ſtudieuſement & peſez en la balance de Critolaus^[7] leurs propous & raiſons, vous trouuerez que & en ceſte matiere, & beaucoup d’aultres ilz ont parlé par guayeté de cœur, & affection de reprendre leurs maieurs, plus que par recherchement de Verité. En cette diſputation ie ne entreray plus auant. Seulement vous diray que petite ne eſt la louange des preudes femmes, les quelles ont veſcu pudicquement & ſans blaſme, & ont eu la vertus de ranger ceſtuy effrené animal à l’obeiſſance de raiſon. Et ſeray fin ſi vous adiouſte, que ceſtuy animal aſſouy (ſi aſſouy peut eſtre) par l’aliment que Nature luy a preparé en l’home, ſont tous ſes particuliers mouuemens à but : ſont tous ſes appetitz aſſopiz : ſont toutes ſes furies appaiſées. Pourtant ne vous eſbahiſſez, ſi ſommes en dangier perpetuel d’eſtre coquz, nous qui n’auons pas tous iours bien de quoy payer, & ſatisfaire au contentement.

Vertus d’aultre que d’vn petit poiſſon, (diſt Panurge) n’y ſçauez vous remede aulcun en voſtre art ? Ouy dea, mon amy, (reſpondit Rondibilis) & treſbon, du quel ie vſe : & eſt eſcript en autheur celebre paſſé a dix huyct cens ans. Entendez. Vous eſtez (diſt Panurge) par la vertus Dieu, home de bien, & vous ayme tout mon benoiſt ſaoul. Mangez vn peu de ce paſté de Coins : ilz ferment proprement l’orifice du ventricule à cauſe de quelque ſtypticité ioyeuſe qui eſt en eulx, & aydent à la concoction premiere. Mais quoy ? Ie parle Latin dauant les clercs. Attendez que ie vous donne à boyre dedans ceſtuy hanat Neſtorien. Voulez vous encores vn traict de Hippocras blanc ? Ne ayez paour de l’Eſquinance, non Il n’y a dedans ne Squinanthi, ne Zinzembre, ne graine de Paradis. Il n’y a que la belle cinamome triée, & le beau ſucre fin, auecques le bon vin blanc du cru de la Deuiniere, en la plante du grand Cormier, au deſſus du Noyer groſlier.

---

1. S. P. Q. R. Le sens de ces initiales, que Rabelais explique par : « Si peu que rien, » est : Senatus populusque romanus.
2. Vnes letres. Cette lettre, qui se trouve dans les anciennes éditions d’Hippocrate, est considérée comme supposée.
3. Sont toutes femmes femmes.

   Mais, Sire, il faut penſer que c’eſt aux grandes ames
   A ſouffrir les grands maux & que femmes ſont femmes.

   (Mairet, Sophoniſbe, I, 2)

   La femme eſt touſiours femme.

   (Molière, Dépit amoureux, IV, 2. — La Fontaine, La Matrone d’Éphéſe)
4. Comme eſcript Ariſtoteles. — De communi animalium motu.
5. Platon. — Timée.
6. Cl. Galen. — VI, De locis affectis, c. 5.
7. La balance de Critolaus. Critolaüs, philosophe péripatéticien, pesait, comparait les biens moraux aux biens physiques, et donnait l’avantage aux premiers. Voyez Cicéron, Tusculanes, V, 17.