Ma peine me contente, et prens en patiance
La bibliothèque libre.
Auteur: Pierre de Ronsard (1524-1585)
Recueil : Amours Diverses
Ma peine me contente, et prens en patiance
La douleur que je sens, puis qu'il vous plaist ainsi,
Et que daignez avoir souci de mon souci,
Et prendre par mon mal du vostre experiance.
Je nourriray mon feu d'une douce esperance,
Puis que vostre desdain vers moy s'est adouci.
Pour resister au mal mon cœur s'est endurci
Tant la force d'amour me donne d'asseurance.
Aussi quand je voudrois, je ne pourrois celer
Le feu, dont vos beaux yeux me forcent de brusler.
Je suis soulfre et salpestre, et vous n'estes que glace.
De parole et d'escrit je monstre ma langueur:
La passion du cœur m'apparoist sur la face.
La face ne ment point: c'est le mirouër du cœur.
