Recueil des lettres missives de Henri IV/1571/2 juillet ― À monsieur de la Force

◄

précédente

Henri IV Lettres missives 1571

suivante

►

1571. — 2 juillet.

Orig. – Arch. de famille de M. le marquis Édouard de la Grange.

A MONS^R DE LA FORCE^[1].

Mons^r de la Force, Le s^r de la Pynaudiere^[2] nous a faict presenter requeste affin d’advouer les actions de guerre et d’hostilité que, pendant les troubles derniers, il dict avoir exercées par commandement de nostre cousin mons^r le conte de la Roche^[3] et du s^r de Sainct-Mesme^[4], qui commandoit à Angoulesme, en un chasteau nommé Chasteau-Jollet qui vous appartient, et sur lequel il y avoit entreprinse faicte par les ennemis pour le surprendre. Encores qu’il ayt rapporté cette certiffication et attestation, signée de personnes qu’il dict estre à vous, et de notaires, comme il n’y a faict aucun mal ny dommaige, ny pris aucune chose, reservé deux cavalles que depuis il renvoya, sçachant qu’elles vous appartenoyent, pareillement representé quelques lettres du commandement qui luy a esté faict de se saisir et investir dudict chasteau ; toutesfois, ayant entendu que vous vous plaignez de plusieurs tortz et dommaiges que pretendez ledict la Pynaudiere vous avoir faictz en vostredict chasteau, nous avons bien voulu differer luy accorder sondict adveu, que au prealable nous n’eussions esté de vous plus particullierement et plus clairement informez de ce dont vous vous plaignés. Ce que vous prions nous voulloir faire entendre au plus tost qu’il vous sera possible, affin que ayant faict jugement de ce qui nous apparoistra sur le tout, nous proceddions sur l’adveu ou desadveu de l’action militaire du faict dont est question, le plus justement et equitablement qu’il nous sera possible. Et attendans, sur ce, bien tost de voz nouvelles, nous ferons fin pour prier Dieu, Mons^r de la Force, qu’il vous ayt en sa tres saincte et digne garde. De la Rochelle, ce ij^e jour de juillet 1571.

Vos bien bons amys,

HENRY,
HENRY DE BOURBON.

1. Francois de Caumont, troisième fils de Charles de Caumont et de Jeanne de Pérusse-Escars, tué dans son lit à la Saint-Barthélemy.
2. Jean Pinaud, écuyer, sieur de la Pinaudière. (B. R. Cabinet généalogique.)
3. Francois, comte de la Rochefoucauld, prince de Marsillac, fils de François de la Rochefoucauld et d’Anne de Polignac, chevalier de l’Ordre du Roi, tué à la Saint-Barthélemy. Dans cette lettre comme dans la suivante il est tantôt désigné sous son nom ordinaire, tantôt sous le nom abrégé de comte de la Roche.
4. René de l’Hospital, seigneur de Sainte-Mesme, second fils d’Aloph de l’Hospital, comte de Choisy, et de Louise Poysieu, dame de Sainte-Mesme.