Orig. autographe. – Arch. secrètes du Vatican. Copie de M. le comte Marini, archiviste de la Sainte Eglise Romaine. Envoi de M. l’ambassadeur de France à Rome.
Tressainct Pere, Comme l’eslection de Monsieur le duc d’Anjou[1] au royaume de Pologne ne pouvoit tomber sur prince plus excellent, genereux, religieux et magnanime, nous estimons aussi que tous princes chrestiens et catholiques desirant le repos universel de ce monde, en reçoivent trez grand contentement. Et combien que ce nous soit un indicible regret pour la perte que nous faisons de sa personne, mesme pour tout ce Royaume, qui par luy a receu la grandeur ; la gloire et l’accroissement de nostre religion et le repos commun de tous nous tempere cest ennuy et le rend plus supportable. Sur tous Vostre Saincteté a rendu de ce plaisir ung singulier tesmoignage au Roy mon seigneur et à luy, par le seigneur Seraphin ; nous ayant aussi par vos lettres et par semblable office tesmoigné le soing et la souvenance qu’elle a de nous en particulier. Dont nous la remercions trez humblement, comptant en cela renouveler les anciennes obligations que nos predecesseurs et nous avons au Sainct Siege apostolique, et mesme ceste-cy derniere des honneurs et faveurs que nous avons receues dans la personne du sr de Duras, nostre ambassadeur, pour rendre à Vostre Saincteté l’obeissance que luy debvons. Lequel, à son retour, nous a tellement faict entendre de quelle affection Vostre Saincteté luy avoit tendu les bras et ouvert le sein de sa charité paternelle, que la memoire d’un tel bien nous sera toujours celebre, pour d’aultant et de plus en plus augmenter le zele et la devotion que nous portons à Vostre Saincteté, au sainct College et à l’Eglise catholique. Pour laquelle nous employerons tous les moyens que Dieu nous a donnés et mis en main, jusqu’à nostre propre sang ; le priant, Tressainct Pere, que icelle Vostre Saincteté il veuille longuement conserver et garder à l’augmentation de nostre saincte foy chrestienne et catholique. Escript de Paris, ce xxe jour d’aoust 1573.
le Roy de Navarre,
HENRY.
- ↑ Alexandre-Édouard de France, nommé ensuite Henri, puis roi sous le nom de Henri III, alors Monsieur, duc d’Anjou, était le troisième fils de Henri II et de Catherine de Médicis. Né le 19 septembre 1551, il fut élu roi de Pologne le 9 mai 1573, devint roi de France le 30 mai 1574, et mourut le 2 août 1589.
- ↑ Voyez sur ce secrétaire la lettre du 13 septembre 1576, note 1re.