Cop. – B. R. Fonds Leydet, Mem. mss. sur Geoffroy de Vivans, p. 73.
Monsr de Vivans, Encores que j’aye juste occasion de me remettre dans mon chasteau de Montignac, et qu’apres tant de requestes et remonstrances que j’en ay faictes au Roy mon seigneur, qui m’a declaré le desirer, nul ne dust trouver estranges les moyens que j’ay tenus, toutes fois, d’autant qu’ils ont donné l’alarme aux catholiques et que les forces qu’avez assemblées leur ont porté quelque opinion de guerre, je me suis resolu plus tost pour le general quitter mon particulier, joinct que mon cousin monsr de Strosse est icy pour faire que de la part desdicts catholiques il ne soit rien entreprins. À ceste cause je vous prie, Monsr de Vivans, faire retirer de devant Montignac celles qui se sont assemblées, et que ceste retraite se fasse le plus doulcement qu’il sera possible, empeschant toutes entreprises au prejudice des edicts, etc.
À Nerac, ce iiij avril 1580.