Orig. — Arch. de M. le baron de Scorbiac, à Montauban. Copie transmise par M. Gustave de Clausade, correspondant du ministère de l’Instruction publique.
À MONSR SCORBIAC,
Monsr Scorbiac, Le sr de Leydiguieres vous dira toutes nouvelles, et comme je continue en ma premiere deliberation de me rendre dans la fin de ce mois à l’assemblée de Sainct Jehan d’Angely, vous pryant d’en advertir tous ceulx des Eglises des environs de Montauban, affin qu’ilz y envoyent leurs depputez. J’ay depesché le sr de Plassac à la Court, [tant] pour me plaindre de la longueur qu’on apporte à l’establissement de la chambre de Languedoc, et à la reddition de mes maisons, que pour faire encor instance d’accorder l’abolition generale pour ceulx de Guyenne. J’ay veu, passant à Castelgeloux, mon cousin monsr le mareschal de Matignon, qui me promit de faire embarquer toutes les trouppes dans le quinziesme de ce mois : qui sera ung grand bien pour le soulagement du peuple et oster les occasions d’une juste deffiance[1]. Advertissez moy souvent de ce qui se passera par delà ; et je prieray sur ce le Createur, Monsr Scorbiac, vous avoir en sa saincte garde. De Pau, le xe may 1582.
- ↑ Voyez la note de la lettre suivante.