Orig. — Arch. du canton de Genève. Copie transmise par M. Rigaud, premier syndic, et par M. L. Sordet, archiviste.
Messieurs, j’ay faict voir en mon conseil les memoires dont vous aviés chargé Lacoste, mareschal de mes logis, pour le remboursement de la somme que les eglises refformées de ce Royaulme vous doibvent ; mais comme ç’a esté avec les depputez assemblez à Montaulban qu’on a ordonné l’assignation pour lesdicts deux mille et tant d’escus, sur et tant moings du principal, aussy ne puis-je qu’avec eulx pourvoir à ce qui reste ; regrettant infiniement que le payement d’une partie si legitimement deue soit si long-temps differé. J’escris cependant aux Esglises de Provence de fournir les dicts deux mille et tant d’escus, et mande à Forget de vous faire delivrer toutes contraintes. Et lorsque l’occasion s’offrira d’avancer l’entier payement, je vous feray apercevoir avec quelle affection je veulx embrasser tout ce qui vous peut apporter de l’utilité : priant sur ce le Createur vous tenir, Messieurs, en sa saincte garde. De Nerac, ce xxiije decembre 1582.