Orig. — Arch. de la préfecture de la Dordogne. Envoi de M. le préfet.
Messrs, Je vous veulx bien advertir de mon arrivée jusqu’en ce lieu en bonne prosperité et santé, dont je loue Dieu, ayant trouvé les choses en ce païs en assez paisible estat, quelques bruits qui ayent couru à cause de ces trouppes qui s’assemblent en ce dict païs, lesquelles ne sont telles que jusques icy elles ayent peu donner grand soupçon de craincte. J’y adviseray toutes fois, pour y pourveoir du mieux qu’il me sera possible. J’espere, avec l’ayde de Dieu, vous retourner voir bientost de par deçà. Je vous prie cependant que tout se maintienne en bonne paix, et tenir la main que rien ne soit attenté au prejudice de l’edict. Je vais à St Jehan, pour communiquer encores avec mon frere, monsieur le Prince estant tousjours apres pour achever de resoudre avec mon cousin, monsr le mareschal de Matignon, ce que concerne une entiere assurance de paix, que je prie Dieu nous vouloir donner, et vous avoir, Messrs, en sa saincte garde. À Jarnac, ce xxiije febvrier 1582.