Orig. — Arch. de M. le comte H. C. de Meslon. Envoi de M. le secrétaire général de la préfecture de la Gironde.
Monsr Melon, Parce que les maire et procureur de la ville de Bordeaux me sont venus trouver, et m’ont promis de s’employer à ce que vostre garnison, et aultres estans des villes de vostre costé, seront payées pour le plus tard dedans quinze jours, je l’ay aussi asseuré que, durant le dict temps seulement, je patienteroys et ne permettroys qu’il fust rien innové d’extraordinaire. À ceste cause, et sçachant que la necessité est grande dedans Montsegur, je vous prie, si vostre santé peut permettre, vous y transporter, et donner ordre pour le moins à ceulx de la citadelle, à faire tant avec les habitans, qu’ils aident aux soldats, en sorte qu’ils ne tombent en necessité durant le dict temps ; et cela faict, je desire que vous me veniez trouver, parce que je seray bien aise de vous voir, et ay à parler avec vous. Ce que m’asseurant que vous ferés, attendu la presse que je vous en fays, je ne vous en diray davantage, si ce n’est pour prier Dieu vous tenir, Monsr Melon, en sa saincte et digne garde. Escript au Mont de Marsan, ce xviije jour de decembre 1583.