Orig. — Arch. de la famille Forget de Fresne. Communication de M. le chevalier Artaud de Montor, membre de l’Institut, allié de la famille Forget.
À MONSR FORGET,
Monsr Forget, J’ay entendu par le sr de Lesignan combien vous vous estes soigneusement employé à la poursuyte et sollicitation de ce qu’il a eu à negotier pour le bien de mes affaires. J’ay veu aussy ce que m’escrivez par vostre lettre, de la provision que avez eue de l’estat de tresorier general de France à Tours, par le decez de vostre beau-pere ; dont j’ay esté bien ayse ; et trouve bon que, puisque vous serez quelquefois empesché à l’exercice de vostre estat, vostre frere ayt la mesme charge que vous avez pour mes affaires à la Cour, en vostre absence, m’asseurant qu’il fraternisera avec vous en la mesme diligence, affection et fidelité que vous avez tousjours demonstré avoir au bien de mes affaires et service ; desirant neantmoins que vous y continuez comme vous avez faict par le passé, quand vous pourrez estre à la Cour, et que les occasions se presenteront, et mesmes presentement. Et pendant que vous y demeurerez, je vous prie avoir l’expedition de plusieurs expeditions qui m’importent, en telle affection, que bien-tost j’en voye quelques bons effects. J’escris à monsr de Villeroy pour me faire assigner des fraiz que j’ay faictz ceste année passée. Il y a aussi le faict de la comptablie de Bordeaux qui m’importe, et l’assignation de mes pensions. En quoy m’asseurant que vous n’obmettrez rien de ce qui deppendra de vous, je ne vous en diray davantage, si ce n’est que je prie Dieu vous tenir, Monsr Forget, en sa saincte et digne garde.
De Nerac, le premier febvrier 1583.