Orig. — B. R. Fonds Béthune, Ms. 8854, fol. 91 recto.
À MON COUSIN MONSR DE MATIGNON,
Mon Cousin, Je viens encores presentement de recepvoir plaincte de mes subjectz de Ryons, à cause de l’imposition d’avoyne qui a esté mise sur la jurisdiction du lieu pour vostre compaignye ; ce qui leur est une grande foule, attendu leur grande paouvreté, et qu’ils sont d’ailleurs assez foulez et chargez des tailles et aultres impositions ordinaires et extraordinaires. Et d’aultant que je vouldroys par tous moyens procurer leur repos et soulaigement, je vous prye bien fort, mon Cousin, de les faire descharger de la dicte imposition pour l’amour de moy, et faire esloigner vostre compaignye vers Perigueux, pour preserver de foule ces quartiers, le plus que faire se pourra, et pour eviter les plainctes et importunitez que vous et moy en pourrions souvent recevoir. Et vous me ferez fort grand plaisir : pryant Dieu vous avoyr, mon Cousin, en sa saincte et digne garde. De Nerac, ce xxviije apvril 1583.
[1] Je vous prie, mon Cousin, derrechef, d’avoir Ryons pour recommandé.
- ↑ Post-scriptum de la main du roi.