Orig. — B. R. Fonds Béthune, Ms. 8860, fol. 30 recto.
À MON COUSIN MONSR DE MATIGNON,
Mon Cousin, J’ay eu advis certains que, en Rouergue, le comte de Quaylus et les srs de St. Suplice[1] et de Bournazel et deux autres que je ne vous puis à ceste heure nommer, font fondre chacun ung canon en leurs maisons, ce qui est de tout temps prohibé, et contraire aux edictz et ordonnances du Roy mon seigneur, et de trez mauvaise consequence, et à quoy il est besoing de pourveoir. À ceste cause je vous prie, mon Cousin, donner ordre que cela cesse et ne passe plus outre ; parce que la resolution est prise entre quelques aultres qui ont suspecte ceste fonte d’artillerye, de faire des fortifications pour se preserver du danger qu’ilz craignent leur pouvoir advenir de la part de ceulx qui ne craignent de contrevenir aux edictz de Sa Majesté en tels cas, et peut-estre de se licencier semblablernent à faire pareille fonte : ce qui ne doibt estre souffert d’une part ne d’aultre. Vous en pouvez estre au vray et plus particulierement informé, pour y apporter le remede qui est requis. Et par ce que en telles choses, dont vous sçavez si bien et de longtemps la consequence, il n’est besoing de vous faire plus long discours, je ne vous en diray davantage, si ce n’est pour prier Dieu vous tenir, mon Cousin, en sa tres saincte protection. De Bazas, ce iiije aoust 1583.
- ↑ C’est le même nom que Saint-Sulpice ; mais alors on le trouve à peu près aussi souvent écrit de cette manière : Saint-Suplice. Voyez, sur le seigneur dont il est ici question, la lettre du 2 mai 1579, note 1.