Orig. autographe. — B. R. Fonds Béthune, Ms. 8828, fol. 10 recto.
Cop. — B. R. Suppl. Fr. Ms. 1009-4.
Mon Cousin, Au lieu que je pensois que mes subjects du Mont de Marsan deussent avec le temps amander, ils empirent tous les jours. Ayans esté nagueres mandés pour se trouver aux Estats de Bearn pour y recevoir, à la coustume, leur part de la donation qui de temps immemorial nous a esté faicte, et où ceulx du Mont de Marsan n’avoient jamais failly, ils ont à present refusé d’y venir, de sorte qu’il a fallu que le reste de mon visconté, hors la ville du Mont de Marsan, ayent deputé pour s’y trouver, comme si ceulx de la dicte ville estoient alienés et separés de mes aultres subjects. Ce que j’ay trouvé fort nouveau et estrange, et m’esbahy de ceulx qui les entretiennent en leur malice et desobeissance. J’espere que le Roy m’en fera un jour la raison. Cependant j’ay bien voulu vous en advertir, m’assurant que c’est chose que vous ne trouverés moins mauvaise que moy, qui vous prie, suivant le commandement que vous avés du Roy et ce qui a esté accordé, me remettre dedans la dicte ville, où, à cause qu’on se meurt à Nerac, j’ay deliberé d’aller demeurer dix ou douze jours, attendant la venue de ma femme, comme aussy je vous prie, mon Cousin, tenir la main à ce que je sois payé de la composition de Perigueux. Au reste je vous prie aimer tousjours