Thresor de la langue françoise/Rade
Rade de mer, c'est proprement le bord de la mer, à radenda terra, Et ainsi dit Virgile au 7. de l'Eneide, Proxima Circeae raduntur litora terrae, Qui est ce que nous disons costoyer la coste, ou plus precisémet nauiguer & aller terre à terre, Il est vray que toute extremité de mer est bord de mer, & toutesfois toute extremité de mer n'est pas rade : car vn port, vne cale ayant fonds sont extremitez de mer, qu'on ne les nomme pas pourtant rades : mais on dit estre rade de mer, ce qui est adiacent à vne plage qui n'a fonds aucun, selon ce on dit, vn nauire estre à la rade.
Ils firent leuer les ancres & haulser les voiles : mais ils n'eurent eslongné la rade d'vn quart de lieuë, que le vent se va tourner. Semble que c'est vn lieu prochain du port, où les nauires demeurent à l'ancre, sans entrer dedans le port.