Veillz Cumunal plaides
Poésies provençales inédites tirées des manuscrits d'Italie, Texte établi par Carl Appel, H. Welter, (p. 55-56).
Veillz Cumunal plaides,
ver breviat lo corves!
E·ill malvaz serventes
que vos auch far e dir,
me tornon en azir,
e·ill vostra janglosia,
don vos faiz escarnir,
me desplaz chascun dia,
e·m n’es vos enoios,
que limars d’esperos,
gals esems e falcos
am mais auzir que vos.
Mas sobrebe vos pres
car viella vos volges,
c’ab autra foraz mes
e fera·us greu soffrir.
E non a obs que·us tir,
tossa, sa drudaria,
se ia se·n vol iauzir;
que no se·n iauziria,
c’outra doas messos
non auria drut de vos;
e de nulla·l ainglos
no sera ia cogos.