Le Mespris de la vie et consolation contre la mort/« Heureus le serviteur officieus et dextre »
Le Mespris de la vie et consolation contre la mort
CI.
Heureus le serviteur officieus, & dextre
Que le maistre benin au logis treuvera
Faisant sa volonté, quant il retournera
Gouverneur de ses biens il le fera seul estre :
Mais le valet hautain, presumptueus, & traistre
Oubliant son devoir, en soy-mesme dira
Mon-seigneur au logis si tost ne r’entrera,
Sur toute la maison je me veus faire maistre ;
Le maistre en fin retourne, & domtant son orgueil
Le fait precipiter en la maison de dueil,
Ou claquettent des dens les grincemens funebres.
Tel sera du Seigneur l’advenement dernier
Qui jugeant sans appel, envoy’ra prisonnier
L’homme peu vigilant aus maisons de tenebres.