Le Mespris de la vie et consolation contre la mort/« Nous nous tirons à part des hommes vicieus »
Apparence
Le Mespris de la vie et consolation contre la mort
LVIII.
Nous nous tirons à part des hommes vicieus,
Mais las avecque nous nous trainons notre vice
L'orgeuil outre-cuidé, l'usuriere avarice,
Et des honneurs mondains l'amour ambicieus :
Nous avons beau changer de lieus plus gracieus,
De chambre ou de logis, par tout ou lon se glisse
Nous gemissons tousjours sous un mesme supplice,
Le ceur & non le lieu nous fait malicieus :
Ce ceur malicieus tousjours nous represente
Les oignons & les aus de l'Egipte abondante,
Et destournant nos yeus du voyage promis
Par tout nous accompaigne ou nostre penser aille,
Nous rangeant à toute heure en nouvelle bataille,
Jusqu'à tant que la mort en seurté nous ayt mis.