En tiel mainere com avés entendue
Se vont François çantant, baordant por la menue,
Loant a aute vois l’aute Vergne asolue,
Q’il ont la flor dou segle, qe piece i fu tolue,
Q’en terre outremarine avoit esté perdue
A suen santisme honor, e or li est rendue :
« Venite, exultemus ! » cescun Frans breit e hue,
« Por la noble engendree que Deu nos a rendue
« Qe conceï Milon en Bertaine sa drue. »
Ensi s’en vont cantant, sens autre retenue,
Trosque ao trié Çarllon ; la ferent desendue
Le niés ao roi de France, Salemon eo cont Hue,
Gondelbuef le Frixon, Sourbuens Barbe-Canue :
Gainelon de Maiance li fist gient receüe.
Ci tourne Nicolais a rimer la complue
De l’Entree de Spagne, qe tant est stee escondue
Par ce ch’elle n’estoit par rime componue
Da cist pont en avant, ond il l’a proveüe
Pour rime, cum celu q’en latin l’a leüe.
Our contons de l’istoire qe doit etre entendue
Da cascun q’en bonté ha sa vie disponue.