◄ Laisse CCCCI | Laisse CCCCII | Laisse CCCCIII ► |
Li vesçons Gotifrois e l’Escoz Guinimers
Arengier les ont feit e prendre les sentiers.
Bien pres de la citez laserent li arcers :
Se ne venist por qoi, nes veroiz estrimers.
Paiens istrent defors, serez come esperviers ;
Grandoine et Ysorez, ces furent les primers,
A quatre mile Turs, jovenes e baçaliers,
Qe de François atandre sunt corajos e fiers.
Adunc s’eslaserent vers les arbalestiers,
E ces tornent ariere, qe ourent buen destrers,
Car lor secors sorvent, qe n’i est lontaniers.
Ja l’encaus lor donascent Espanois volantiers,
Mais s’il verent les fers des lances aguz clier
Qe furent en agait joste les oliviers,
E verent les barons, none senblent pais bergiers,
Taisans et embrunciez cum furent costumiers ;
Atendrent qe Paiens venisent as graviers.
Lors se ratenirent les culvers losangiers ;
Ja d’euls ne s’an desflote neis uns des escüers.