| ◄ Laisse CCCCXLVIII | Laisse CCCCXLIX | Laisse CCCCL ► |
Mout par fu Felidés ardiz et saje et pront ;
Oliver mercia et enclina perfont,
E dist que il fera tot quant q’il li despont.
L’ensegne al bon roi Carles, ou les lis d’or i sunt,
Li baila Oliver, et cele al noble cont :
Comande les portier sor l’aute tor amont.
Engeler mout rova de torner, e s’en vont.
Pués distrent as Paiens le voir a pont a pont,
Ce qe Rollant les prie e comande e semont
Qe, se il creent Celui qe sor Calvarie mont
Fu penez en la cros, mout bone peis avront,
Ne meisons ne diner ni avoir i perdront.
« Signor, e car le feites, car n’a tiel home ou mont
« Come celui Rollant c’avarice confunt.
« Qi un jor une fois le puet veoir en front,
« Se cil jor avra mal, ja Diex bien ne moi dont ! »
Saracins, quant l’oïrent, entr’aus grant joie en font ;
Disent de Jesus croire et Machon gerpiront.