| ◄ Laisse CCCLXII | Laisse CCCLXIII | Laisse CCCLXIV ► |
Quant furent li arceor tuit treit a une partie,
Si broce Synador a la barbe florie,
Paumoiant son espli, o l’ansaigne balie
A une neire aigle de dos colors partie,
De blanz e de vermoi, la campagne dorie ;
Escus e sorensaigne lui ferent compaignie.
Çante oit l’espee que fu Pantasilie,
Cele qi vint as Troiens en aÿe.
Devant s’en vient quere chevalerie
Sor la bataile qe le cont Gaenes guie.
Gaenes le voit, ne lui desgree mie ;
Volanter li meïst sa demande en otrie,
Mais Gundelbuef par fu qe tot li contrelie
E dist : « Je li irai, par Deu le fil Marie ;
« Amïel vengerai, se Diex m’enpreste aÿe. »
Lors broce le ferant, qe li vient d’Ongerie ;
Encontre l’amirant a sa voie colie.
Donc fu bien la bataile d’anbe part esgardie ;
Le uns rois requiert l’autre par sistres grant aitie
Ja ne lor valdroient les escus une lie ;
Fors furent les obers, cels le tenrent en vie.
Gundelbuef frait sa lance, cele au Païens nun plie,
Anz enpaint le Frixuns, qe des arçuns le guie ;
Tot envers cheit le roi an mi la praarie.
Retorner veult le Turc o l’espee forbie ;
Retinir veult le roi, quant sa ensaigne rescrie.
An aider son seignor nuls Frixuns ne s’oblie.
La oit de branz d’acer tres grant carpenterie.
Se Damediex n’en panse, le filz sainte Marie,
Grand domaje i avront François avant complie.